曼聯前鋒雲尼斯達羅會喺呢個夏天，同佢拍拖多年嘅女友莉安迪恩拉拉埋天窗，但我求大俠就八到，「雲佬」居然冇請同佢好friend嘅前曼聯隊友碧咸。
碧咸因為同曼聯領隊費格遜唔妥，先至喺舊年夏天由曼聯過檔皇家馬德里；雖然係咁，佢同曼聯班球員仍保持聯絡，重同個別球員好似加利尼維利同「雲佬」好friend㖭。「雲佬」喺嚟緊夏天結婚，外界都認為佢一定會請碧咸，但佢就冇咁做。
點解會咁？聽聞係「雲佬」驚碧咸見到費格遜，會有不愉快事情喎，就決定唔請碧咸。不過，係人都知碧咸同佢老婆維多莉亞係風頭躉，無論喺乜嘢場合都係傳媒焦點；而計我求大俠話，唔知係咪雲佬怕碧咸伉儷搶咗佢同佢未來老婆嘅鏡，於是就搵老費過橋呢？
連同對摩納哥場波，皇馬魯爾經已踢咗八十六場歐冠盃（改制後）賽事，取代曼聯加利尼維利，成為歐冠盃上陣場數最多球員。前紀錄保持者係加利仔，只要細心諗吓，曼聯除咗九五?九六年外，屆屆都有份踢歐冠盃，所以加利仔踢咗成八十五場，一啲都唔奇。
皇馬中場碧咸喺上周聯賽對畢爾包，以長髮飄飄新look登場，可惜球隊輸波。前晚歐冠盃對摩納哥佢就紮番起啲頭髮，果然幫到球隊贏波喎！不過佢同阿根廷人繼續宿怨，俾摩隊陣上唯一阿根廷仔貝拿迪「噬」咗兩嘢；最慘次回合兩人都停賽，想報仇都唔得囉！
西甲球會桑坦德會長戴亞斯日前開記者會，話前鋒列基路喺上周聯賽對切爾達前，收到神秘電話要求協助「打假波」，但列基路並無咁做。結果兩隊踢出個大冷四比四和局，主角列基路亦喺三十四分鐘已被兩黃一紅罰離場，令球隊打少個；種種迹象睇，都真係有啲假波feel喎！
溫布頓早前俾個財團收購咗，逃過清盤一劫，但前晚英甲喺主場輸畀米禾爾○比一，連輸十場兼連續七場冇波入之餘，重令本報班名家博冷不成（亞洲盤走盤）。眼見列斯解決財困後即刻喺禮拜一場超聯贏曼城二比一，本報名家諗住溫布頓都可以威番一次，點知……。