經紀陳兩個星期前品題過第一天然食品（1076），當時重話有古仔跟尾，但股價一直冇乜變化，小初本想就咁算數，但經紀陳舊事重提，話唔好咁快放棄，隻股即將有動作。
經紀陳話，第一天然產品向來以外銷為主，但據講下個月初，公司將同大陸食品商合作，發展內銷市場。
第一天然上個月底按先舊後新方式，每股0.64元配售8000萬股，集資5120萬元，雖然上個星期大市回落，但股價繼續守得好穩，企在配股價樓上。睇嚟如果市況相就兼有消息配合，隻股要重拾升浪並非難事。
第一天然噚日冇升跌，收0.68元，成交只得182萬元，未有開車迹象。
另外，同樣係早排批過股兼且完成改名嘅中信21世紀（241），經紀陳一樣話古仔未完，上次批股嘅貨源大部份落入友好芬佬手上，基本上冇乜貨流出街。
隻股噚日高位0.97元，收0.95元。
慕容小初