揭發中國爆發沙士疫症嘅醫生蔣彥永，早前於人大兩會期間又再出招，上書要求中央為六四事件正名，蔣醫生咁英勇令唔少人肅然起敬，香港支聯會對之卻相對低調，支聯會主席司徒華話佢哋唔係忽視蔣醫生嘅行徑，只係擔心支聯會太高調，反而會害咗蔣醫生。
今年係六四事件十五周年，華叔話會搞多幾個悼念活動，其中一個重點係「五一黃金周」，華叔話唔少自由行內地遊客對支聯會好有興趣，所以支聯會早已以簡體字印製傳單，今年將蔣醫生公開信印埋落傳單，加足料派畀大陸遊客。
華叔解釋中國好多地方新聞仍然封鎖，唔少同胞可能未知道蔣醫生公開向北京高層要求平反六四，支聯會正好趁五一黃金周大量內地客來港，向內地人傳遞呢個訊息。中央嘅自由行，會俾華叔嘅妙計騎劫，散播自由火種，唔知國家會唔會斬腳趾避沙蟲，嗌停自由行？
傳真︰2623-9278
電郵︰