咪以為踢大球會就一定薪優糧準，好似拜仁慕尼黑咁，佢哋因為喺歐冠盃十六強出局，所以班球星可能要減薪。
拜仁副會長路明尼亞日前接受雜誌《體育圖片》時話，佢哋喺今屆歐冠盃踢得唔好，喺十六強輸畀皇馬行人止步，保守估計唔見咗千幾二千萬歐元，加上喺今個夏天又要買新球員，故此就計劃減球員人工，目標重定喺十五至二十個巴仙。
拜仁班球員要減薪，士氣難免受損；不過講真呀，佢哋喺今屆歐冠盃真係打得好差，雖然有馬卡爾、波勒同簡尼等球星壓陣，但踢到不知所謂，分組賽同實力一般嘅些路迪、里昂同安德烈治同組，竟然幾經辛苦先出到線，真羞家！
做人嘅嘢，要對得住自己又要對得住人，家陣事實擺在眼前，拜仁班球星真係踢得唔好，佢哋冇俾人炒魷魚，咪算執到囉。
維杜卡日前就話，佢搏埋條命都要幫列斯留級英超，但係佢咁做就唔係為咗間會，而係費事整臭自己個名；事關呢位澳洲前鋒話唔想自己份履歷上面，寫有降班呢兩個咁核突嘅字。或者你會覺得維杜卡好自私，不過我求大俠覺得佢肯盡力幫列斯打護級戰，話之佢係為咗邊個。
彭拿典奈高斯嘅干沙利斯因為不滿佢隊友柏柏度普路斯喺比賽時唔交波畀佢，賽後喺更衣室內拳毆對方，結果俾球會罰五萬歐元；俾人打嘅柏柏度普路斯因有還手，亦要罰二萬五千歐元。我求大俠就認為，彭隊咁做對柏柏度普路斯唔公平，打架係唔啱，但俾人打冇理由唔還手。
神戶勝利船以破日本職業聯賽紀錄嘅四百五十萬美元簽靚仔前鋒伊利安返嚟，點知呢位土耳其球員只係打咗兩場聯賽，就整親膝部韌帶，𠵱家去咗意大利醫。勝利船簽咗伊利安後，預計會多咗一倍人入場睇佢哋比賽；家陣伊利安搞成咁，唔知唞到幾時，佢哋隨時做蝕本生意。
意甲聯摩德納前日啱啱委任貝洛圖為新教練，呢位前威尼斯教練要執馬里辛尼剩落嚟嘅爛攤子，護級壓力已經好大，最慘係佢第一日領軍操練，就即刻收到中場主將米蘭列圖因膝傷，證實今季玩完嘅壞消息，另外又有個別球員已經養緊傷，佢呢次真係傷腦筋啦。