楊恭如昨日到灣仔出席護膚品活動，在北京拍劇四個月的她因不慣當地食物而消瘦十磅，體重跌至一百磅。不過，楊恭如開心透露一次過勁賺過百萬元，將請母親遊日本狂掃春裝，更會即買即着。
陳嘉容和楊恭如昨日在灣仔出席SK-II去斑產品發布會，久未露面的楊恭如穿上棗紅間條長裙，消瘦不少，她透露剛從北京回港。
楊恭如大吐苦水說：「喺北京郊區拍四十集古裝劇，捱咗四個月，冇啖好食，因為嗰邊只有餃子、羊肉同飯盒，我唔食羊，惟有日日捱飯盒，足足瘦咗十磅，𠵱家得番一百磅，返到香港，食快餐都好好味。」
楊恭如謂幸好有過百萬元酬金作回報，但她不會在港買樓，她說：「我𠵱家住緊嘅地方啱啱續咗約，香港樓巿幾低都係好貴，我寧願返內地買，已經一早喺上海置業，重升值唔少㖭！」
楊恭如又表示稍後將帶母親往日本東京瘋狂shopping，她一臉興奮說：「我有齊彈藥，買三個空篋，重有，我只會着一套衫，到時去到東京就狂買，即買即着，日日着新衫，因為喺北京拍劇『餓』咗好耐冇買嘢，咁我又唔買樓，咪買衫囉！」
提到感情事，楊恭如表示現階段工作至上，她說：「冇人追喎，內地都冇，愛情係講緣份嘅，唔急得。我𠵱家專心工作，工作已經排到年底，係呢行做女演員冇男演員咁好，幾十歲都可以襯二十歲女主角，所以要珍惜青春，盡情拍戲。」
而同場出現的名模陳嘉容則談到台灣選舉爭議，她表示不擔心演變成騷動，她說：「我個人支持連戰，因為覺得佢整體做得幾好，感覺又老實啲，重幾親民㖭。」
採訪：DebbieLum
攝影：ChanKwingWai
