上周有周刊報道指鄭秀文（Sammi）飛起經理人郭啟華，將與跟隨她已有八年的助手阿爽和其胞姊Serena自組公司。Sammi得悉後大怒，認為阿爽是放料「二五仔」，即日解僱阿爽並沒有任何賠償。曾與Sammi傳緋聞的阿爽胞姊Serena昨日替妹妹叫屈。
鄭秀文的助手阿爽跟隨她已有八年，日前突然遭解僱，原因是上周二有周刊報道指Sammi將會飛起經理人郭啟華，與阿爽及其胞姊Serena自組公司發展事業。
據知Sammi看完報道後大發雷霆，並聯想到過往自己的行蹤被洩露，懷疑阿爽是「二五仔」，即時叫阿爽離開，並說：「件事肯定係你兩姊妹搞出嚟，我以後唔想見到你。」
Sammi助手最後一日開工是上周三，當晚她陪Sammi到南華會拍攝新片《龍鳳鬥智》，之後Sammi再為電影開工時，已沒有見到她出現。記者昨日致電阿爽問她是否已沒為Sammi工作及有何感想時，她支吾以對地說：「我……冇嘢講呀！」而記者昨日在阿爽胞姊Serena位於大坑的寓所守候，約晚上七時Serena返家時向記者證實妹妹這幾天確實沒有上班。
Serena說：「就算真係炒，都應該有一個月或者三個月時間通知，𠵱家又冇話有賠償，阿爽喺屋企又唔敢搵嘢做，希望佢哋可以理性啲，用勞工法例去處理。」據知阿爽現時每月薪金萬多元，八年來從沒放過大假，而且她與Sammi之間並沒有僱傭合約，若要追討賠償可能求助無門。
記者問到Serena與Sammi另組公司的消息是否屬實時，她說：「梗係唔係啦！呢個報道唔止搞到我個妹冇咗份工，對我亦有好大影響，我喺一間上巿公司做嘢，因為我職位唔低，亦持有公司嘅股份，我唔做嘅話對公司嘅股價都可能會有影響，公司𠵱家要對我進行內部調查，所有銀行戶口都要查，我又要逐個客打電話去解釋，真係搞到我好麻煩。」
Serena續說：「我根本唔係做開娛樂圈嘅，又點會同佢搞公司？再講鄭秀文何德何能請我呀？我年薪幾百萬，就算佢請得起，但搵個外行嚟做又符唔符合經濟原則呢？點解佢（Sammi）唔查清楚單料係邊個放出嚟嘅？最後邊個會得益？阿爽做咗八年佢都唔信。」
有傳聞指阿爽為Sammi工作以來，多次遭人掌摑，更有工作人員曾目睹事件發生。記者昨日問Serena可知此事？她說：「發生呢啲事嘅時候我又唔喺現場，不過有咁多人見到，你可以去問佢哋吖！」
年前曾有報道指Sammi與Serena交情深厚，更有周刊指兩人是同性密友，對此Serena說：「我同佢係近年先識嘅啫，其實已經年幾冇見過佢，以前一齊食吓飯俾記者影到，公司都唔會覺得係乜嘢咁大件事，但𠵱家傳埋啲咁嘅消息，公司就一定要查清楚。」問Serena如今還會否視Sammi為朋友，她說：「我唔想評論，我所有嘅朋友，都係心地好兼正常人。」
此外，Sammi的經理人郭啟華昨日在電話中否認阿爽被炒，他說：「阿爽病咗幾日，𠵱家休息緊，我早排病咗，可能探班時傳染咗佢，我自己都病咗成個星期，等佢休息吓先再返工囉！」對於郭啟華的說法，Serena則回應說：「阿爽八年嚟都冇病過，咁啱呢個時候就病咁奇怪？」
採訪：張止寒、蔡如育
攝影：娛樂突發組
