隔晚美股散完，昨早日股又跌2.2%，睇住港股好難有運行。中段台灣局勢傳有轉機，日股跌幅又收窄，港股進帳37點。下一步，台灣局勢若然柳暗花明，港股有機會反彈。
滙控（005）定得住，收116.50元，冇升跌。可以諗少少滙控Call輪博吓，正路對象係9173，隻輪近日創出掛牌半年新低，7月夠鐘，輪價39仙，溢價6.4%，槓桿率29.9倍，數據算係一般，勝在買賣易，有69球易手，上車或跳車都好方便。9640數據其實更靚，槓桿率16.4倍低過9173好多，但勝在9月至到期，壽命方面着數好多，而溢價4.8%又唔貴，要嫌嘅話，就係交投唔算暢活，比較適合揸中線。
和黃（013）近排弱過乜，3G前景成為阻住股價回升因素，不過月頭到𠵱家已經散咗17%，到咁上下會有希望技術性反彈。和黃Call輪非常多，但唔少嘅溢價非常高，30%甚至超過40%嘅都有，呢批輪，咪淨係睇槓桿率嘅爆炸力，要諗埋風險嗰便。9058比較啱埋手，7月到期，輪價37仙，溢價5.8%，5月打後嘅和黃Call輪，溢價最低係佢，而槓桿率15倍亦唔算低。
太A（019）業績好過預期，收50.50元，跌50仙，估計5字守得住，執少少Call輪9372，6月到期，輪價34.5仙，溢價3.6%，槓桿率14.6倍。正股派末期息1.02元，隻輪實際溢價要打多兩個百分點上去。
章盛