外圍持續偏軟，但港股跌至12424迅速反彈，最高升至12665，收報12588，升37點。
美林噚日晨早唱好港股，叫客戶增持，因為香港冇台灣嘅政治問題，加上近期公司公布業績多數靚靚，唔趁𠵱家調整吸納，還待何時？其實美林好早之前已經唱好港股，預期明年首季恒指可見18000。港股早前升至14000水平開始調整，如果現在完成調整再展升浪，話唔定美林目標可達到。
新濠國際（200）傳聞話會發行逾3億元新股，收購董事總經理何猷龍旗下摩卡老虎角子機業務，成為本港首隻正式從事賭博業務的上市公司。世紀建業（079）早前話踏足澳門賭業，其實只不過係入股一間專門介紹客人去賭錢嘅公司，唔算係真正經營賭博生意。何生兩父子借此機會增持新濠，相信復牌後有好戲睇。
蜂林（8156）停牌後傳出收購問博（8212）。市場一直傳蜂林將不斷收購擴大業務，希望借併購消息將股價炒高。
不過，收購問博消息如果屬實，則蜂林嘅收購行動似乎無乜章法。蜂林本身是從事天然食品製造，而問博則是一間解決方案供應商，兩者業務風馬牛不相及，何解蜂林要重鎚出擊收購一間市值高達7419萬元的上市解決方案供應商呢？市場對此反應未知，但阿虎則好有保留。
阿虎