舒淇嘅新片《見鬼2》近日喺全亞洲上畫，口碑同票房嘅反應都唔錯，但係，點知近日就有人摷番佢陳年裸露片段出嚟，擺喺網上流傳，呢條片係舒淇嘅全裸沖涼片段，重話佢千方百計想買番。馮仁昭都上網睇過，真係戥舒淇慘，想洗底都咁難，不過講真，呢輯片段，真係好激㗎。
記者噚日就打電話畀舒淇問番佢呢件事，舒淇話：「點解會咁，每次只要有少少好事情發生（指《見鬼2》賣座理想）就會再嚟一次，我唔希望用無奈嘅字眼，畢竟我唔能夠否決我以前做過嘅事，不過我從來冇諗過或採取行動要買番，根本就買之不盡，如果重有不法商人想搵我啲舊作品搵錢，我係唔係應該覺得驕傲，證明自己重有賣點呢。」
舒淇之後講笑咁話﹕「請轉告我嘅fans，呢啲舊嘢唔使睇啦！我再搵時間拍一啲靚靚嘅相畀大家睇！」
安雅近日同台灣名主持吳宗憲傳緋聞，佢噚日喺台灣出席電視宣傳活動，占卜師指安雅嘅眉形好靚，但要等到三十歲先可以行眉運，所以佢最少重要行多幾年霉運。安雅表示以前都將錢花喺男人身上，近年先學懂咗買嘢獎勵自己。
日前尖沙嘴有人因爭車位問題報警求助，點知警員去到了解，有幾個懷疑江湖人士襲警，有報道話間舖頭係梁思浩嘅，噚日梁思浩就話間舖頭之前叫「私房菜」，佢喺上年已經轉咗手畀人，當時佢同對方傾咗唔可以用佢個名做宣傳，但係結果間舖頭之前用佢個名報咗兩次警，佢今次忍無可忍，會同律師傾下，然後要對方交代。
黃秋生前晚喺中環出席話劇「家庭作孽」演後聚會，對於陳冠希（Edison）日前在街頭遇襲，秋生話：「藝人唔好彩，鬼叫佢唱歌似黑人，『印』身『印』勢，似賣白粉咁。」秋生亦指摘咗襲擊Edison嘅兩名就讀國際學校嘅菲籍少年，秋生話：「教都冇用，讀乜鬼國際學校。佢哋十幾歲，毛都未生齊。」
王喜噚日喺元朗拍攝劇集《水滸無間道》，對於無綫開始減少藝員嘅海外騷，佢就話：「其實TVB都守到一個最後防線，過往行動都好溫和，以一個大機構嚟講，精簡架構係必然，TVB已經做到將傷害性變最細。」咁識擦鞋，睇嚟佢都唔怕減騷之後會少咗工作啦！
台灣天后張惠妹日前幫一個飲品拍廣告，佢一身露背同熱褲嘅夏裝打扮，令人熱血沸騰。阿妹喺鏡頭前不停跳舞，希望畀人熱力四射嘅感覺，因為導演要求高，雖然阿妹連續NG咗三十幾次，但佢都仍然好落力演出，不過咁跳法，馮仁昭怕佢跳到腳跛啫！
無綫為減省資源，決定取消製作海外慈善騷，噚日外事部助理總監曾醒明強調無綫唔係縮皮，佢解釋話：「只係唔想呢啲騷成為例牌菜，因為每次呢啲騷都動用好多人力物力，但收視一般，所以倒不如集中火力調配資源，日後會選擇一啲有特色嘅節目去做。」
