美股近期大跌，拖累港股回軟，咁啱有「華爾街女股神」稱號嘅高盛投資策略委員會主席艾碧柯恩（AbbyCohen、前譯科恩）抵港，展開一連三日演講，八方又點會錯過。
柯恩喺九十年代幾次準確預測美股大升，因而名噪一時，屬於美股大好友，只係喺科網股時代估錯大市調整力度。據悉，柯恩周一抵港後，首先出席一個多元化研討會，噚日則有一場午宴演講，逾四百名本港金融界人士出席，包括長實董事葉德銓、中原主席施永青等。女股神昨午排滿一對一會面，向某啲特級大客面授機宜，今日離港，行程緊密。
至於佢對美股嘅睇法，大家可以揭去財經版睇睇。不過，午宴答問期間，有人問美國股神畢菲特前排先話美股偏貴，點解女股神仍看好美股？柯恩話對方係以企業投資角度去睇，但佢則以多數基金經理客戶角度去衡量投資價值，兩者有分別，所以看法各有不同。
傳真︰2623-9278
電郵︰