繼裴勇俊旋風之後，老拍檔崔智友前日亦去咗日本，為佢兩個做嗰套《藍色生死戀2》攞感謝旗。
我羅拉聽講話《藍》劇已經成為新嘅日本社會現象真係誇張，但見套劇重播兩次，同相關嘅書籍喺當地賣成過百萬本，前日NHK電視台重出動到好似邵逸夫咁嘅級數嘅台長嚟迎接崔智友，加上其他電視台完全唔理門戶之見，迫爆NHK嘅記者室，就知道呢套劇嘅風頭一時無兩。
崔智友唔知係咪高興得滯，當日全程古靈精怪，表情多多。現場啲記者見佢咁斯文高䠷，重同佢起咗個「韓國松山鳥菜菜子」嘅綽號。雖然有啲記者只係叫佢劇中嘅名，不過佢一啲都唔介意，重叫記者介紹啲好地方畀佢，佢話：「我搭車見到日本啲舖頭好得意，好想買啲小擺設留番下套劇用。」
講到興起時，崔智友重爆裴勇俊拍戲時攰到瞓着咗，佢話：「我對住瞓到打鼻鼾嘅佢拍苦情戲，搞到NG好多次呀！」
另外韓國就有報紙話，裴勇俊喺香港時有個日本fans為咗追佢受咗傷，裴勇俊即刻親筆寫咗封信慰問佢，搞到個fans開心到泣不成聲。
特約記者森林檎東京直擊