台灣大選，疑雲重重，睇電視睇到透不過氣來，星期六下午刨馬之時，搞到心不在焉。呢套現實選舉活劇，十年八年後，或者二三十年後，可以拍成電影，初步睇嚟，連戰乃係三國演義裏面嘅袁紹，雖然家世顯赫，五代三公，始終係公子出身，點都唔係曹操敵手。
台灣大事係總統選舉，香港大事係打吡大賽，既然自己理唔到，唔明白台灣人選舉點解咁笨，唔識學香港咁用原子印，竟然用最古老嘅印章印呢。弄成三十三萬幾廢票，不如做番一啲自己明白嘅事，就係入馬場，睇邊隻馬會贏打吡。馬膽唔使諗，就係一號「幸運馬主」啦，聽馬會董事、打吡專家周永健律師在新城財經台講打吡：「幸運馬主」係擂台躉，「勁闖」有威脅，冷馬有「好利來」、「幸運之寶」、「貝多芬」，熱腳有「祝福」、「土星」。左丁山知道「勁闖」狀態顛峯，唔睇唔得，其他啲馬咯喎，想起信和置業主席黃志祥最近行好運，名下啲馬喺香港、澳洲、法國分別勝出；年初話要用一千萬港紙買南非短途馬王「貨幣名駒」，點知傾到差唔多之時，對方拒絕出售。哈，天有不測之風雲，隻「貨幣名駒」返到南非，最近居然因急病死亡，黃志祥呢一千萬可謂失而復得。既然佢咁好運，一於捧佢隻「好利來」，三重彩用「幸運馬主」拖「勁闖」、「好利來」，騎騎，中到正，真係好想走上董事廂房，多謝周永健董事提醒，以後有大賽事，唔該佢再上電台講心得！