一身好舞功的郭富城和蕭芳芳前晚綵排熱情探戈舞，由於芳芳的聽覺有問題，故她排舞時需戴上耳塞，聽不到音樂的芳芳全靠拍檔城城帶領跳舞。
郭富城和蕭芳芳前晚在灣仔綵排下周六（下月三日）舉行的無綫節目《護苗基金星輝夜》，二人合作跳阿根廷探戈時，非常合拍。
舞技精湛的城城不時擁着芳芳姐的腰肢跳舞，他說：「呢隻舞係好熱情，講求合作性。我覺得同芳芳姐合作好榮幸，佢不愧係舞后，佢係我合作過嘅前輩或藝人之中，暫時冇人可以代替。」由於芳芳姐的聽覺一向有問題，故排舞時須戴上耳塞，以免音樂太大聲，令她暈眩。城城對此說：「芳芳姐為呢次演出要忍受痛苦，佢嘅難度係聽唔到音樂，所以拍子都要靠我。芳芳姐重專登請咗位意大利老師返嚟教我哋。」
芳芳姐跟城城互送高帽，她說：「佢係跳舞好拍檔，靚仔又專業，我同佢排完舞兩個鐘，諗住大家不妨休息吓，點知城城話可以繼續跳，我咪捨命陪君子。呢隻舞本來跳一分鐘，但城城建議加長至兩分鐘，對佢嚟講梗係輕而易舉。」
而早前有報道城城寓所的天台有僭建物須要清拆，而負責設計的葛民輝亦要負責任，城城說：「啲報道想做新聞，唔好傷害我身邊朋友。」
此外，城城昨往中環KeeClub出席法拉利活動時，獲送贈一支價值一萬一千元的鋼筆，他表示會視為珍藏。
採訪：顏英儀、李珮洳
攝影：陳烱威
