台灣選舉風波仍未了結，但台灣股市噚日識得從低反彈，所以本地投資者又繼續股照炒。經紀黃推介在明日公布全年業績嘅勤達印刷（1172）。
勤達股價喺舊年大幅上升，當中密密買入嘅基金有金手指，佢買到今年1月先至收手。勤達本身業績唔差，去年9月公布截至6月底止半年業績，純利有2030萬元，比上年同期大升67%，兼夾有中期息每股1仙。
經紀黃話，如無意外，勤達全年業績唔會走樣，同時亦會有唔差嘅股息派發。隻股股價喺舊年雖然升咗好多，但現時同高位比較唔差得好遠，明顯反映冇乜人沽貨，況且勤達屬莊氏系股份，呢系股份向來都炒味濃郁，吼低位上車應該有得執。
另外，小初早排提過配股後腳仔軟嘅中信資源（1205）不宜睇淡，日前在股東會上通過收購澳洲鋁廠生意，股價噚日上升4.35%，收1.44元。不過仍然見到唔少沽盤，可能係上次配股接咗貨嘅投資者因為見到家鄉急急沽貨。
慕容小初