費城76人冇咗艾華遜會點？可能重衰過湖人冇咗「四條煙」！如果閣下咁諗就錯喇！喺最近八場波中，艾華遜因傷缺陣咗五場，76人竟然爆冷贏咗四場。好似噚日主場對小馬，喺受讓七分半下，76人爆大冷以一百零七比九十八贏波。相反，有艾華遜壓陣嘅三場波，76人竟然全部輸晒。
睇嚟76人冇咗艾華遜打得重好！其實艾華遜最近經常受傷，戰力大減，好似近三場復出時平均分只有十七分左右，同佢之前平均得二十六分相差好遠，自然唔能夠再好似以前咁一夫當關喇！而且佢最近又同教練反晒面，影響到佢嘅角色同發揮。睇嚟76人唔單只無緣入今年嘅季後賽，艾華遜下季更加可能要搬家。76人係時候為將來打算一吓喇！
富咸領隊高文表示，隊中借將稻本潤一所屬球會大阪飛腳，向佢哋要求買斷稻本嘅二百五十萬鎊（約三千六百萬港元）轉會費太貴，所以季後借用期滿就放人。我求大俠覺得稻本雖唔係正選，但每仗都吸引到唔少日本人捧場，加埋球衣紀念品等，富咸唔要人，蝕底可能係佢自己喎。
據英國《太陽報》報道，曼聯領隊費格遜準備喺季後用一千七百萬鎊（約二億四千萬港元），向車仔收購中場杜夫。記得費Sir今季前多番拒絕布力般開出約一千萬鎊嘅轉會費，結果畀車仔搶走杜夫；𠵱家要出多七百萬鎊，杜夫又喺今季傷過一段時間，費Sir會唔會「老襯」啲呀！
效力意乙拿玻里嘅M韋利，同佢阿哥韋利一樣都係雙重國籍，可揀代表意大利或澳洲，但佢就揀咗後者，重有望喺本月尾友賽南非時，作國際賽處子登場。我求大俠好認同佢嘅決定，事關意大利國家隊人才濟濟，點會輪到佢。話時話，唔知第日佢兄弟有冇機會喺國際舞台交手呢？
多蒙特因財困會喺今夏賣走羅斯基、梅斯達同基爾等球星，但佢哋主席尼包姆就講明只會賣畀英超球會，唔考慮德甲、西甲同意甲球會，因為呢三個國家嘅球會，唔似英超球會出手咁闊綽。我求大俠認為，尼包姆擺明當英超球會係水魚，如果我係英超球會老細一定壓多蒙特價。