【本報訊】要數最常見的身體毛病，頭痛必然高踞榜首，即使明知藥物治標不治本，各式「特效」、「快速」、「無睡意」止痛藥依然是不少患者的「仙丹」。有註冊脊醫生解釋，頸椎移位是頭痛的根源之一，用錯枕頭、「啪頸」、玩碰碰車及笨豬跳也是令頸椎移位的原因，無需用藥都可以根治。 記者：張嘉雯
「有啲人六、七歲開始頭痛，原因搵唔到，醫生亦check唔到，由細累積到大，細細個就開始食止痛藥。」註冊脊醫邵力子解釋，頸椎第三節的神經用以控制頭部，若頸椎移位、神經受壓就會導致頭痛。
邵力子表示，因頸椎引起的頭痛個案中，愈來愈多是兒童，平均十個病者中就有一個是兒童，「𠵱家啲小朋友個個讀書寫字用電腦，夜晚又唔好好瞓覺，一打機就打通宵，做運動少。」
除此之外，使用不合適的枕頭亦是頭痛的元兇，「枕頭唔啱會令到肌肉唔平衡，肌肉硬咗就會壓住頸椎。」邵力子稱，所謂合適的枕頭，高度應該剛好符合膊頭至頸的高度，「太高太矮嘅（枕頭）都唔啱，會令到一邊肌肉緊一邊鬆，咁就會頭痛，甚至手痹。」
邵力子警告大家切忌「一個枕頭成家人用」，「要計番膊同埋面嘅距離，好似男仔用嘅枕頭就唔啱女仔用，巿面上好少有細路仔專用嘅枕頭，迫住細細個就用大人嘅高枕頭，瞓到出事（頸椎移位）。」
他建議大家選購有弧度的枕頭，因為支持力較強，「可以買兩邊高，中間凹嘅枕頭，兩邊可以一高一低，高嗰邊可以承托住條頸，矮嗰邊可以令個頭輕微向後仰，維持番頸嘅弧度。」他解釋，初時使用這種枕頭，可能會有不適，甚至頭暈的情況，用者在使用初期可以將枕頭反轉，減低頭部向後仰的角度，慢慢適應。
「要避免唔好突然間轉頭、『啪頸』，同埋盡力避免單邊聽電話。」邵力子指出，除長期從事文書工作的人是「高危一族」外，喜歡玩過山車、碰碰車或笨豬跳（bungeejump）的人都要小心，「美國好多個案係撞車之後出現，有啲人撞完車無事，三、四日後開始覺得頭痛，或者玩過山車咁，都可能會有『鞭打症』（即頸部曾突然大幅度被拉扯而受傷），唔單止頸椎，脊骨亦可能移位，長期唔理就會頭痛。」
他警告若長期不理會頸椎移位的問題，經年累月骨骼會勞損退化，可能形成骨刺。