不經不覺，熊貓安安、佳佳已經嚟咗香港5年，所以喺嚟緊4月，海洋公園將會舉辦一個大熊貓派對，等市民有機會一嘗當熊貓護理員滋味，兼與安安佳佳共進早餐。復活節假期將至，帶小朋友親親大熊貓吧。
記者：陳震霖
攝影：梁細權
模特兒：Christine、Fa、嘉嘉（StarAsia）
熊貓正式學名叫Ailuropodamelanoleuca，意思係有貓腳掌嘅黑白色動物，居住喺氣候潮濕嘅竹林山嶺中，壽命平均30歲，熊貓1歲相等人類3歲；因為吸收能力低，所以熊貓每日要花14小時進食10公斤竹葉，其餘10小時休息。雌性熊貓適合懷孕嘅日子一年只得1至3日，加上眼角高，難選擇合心水雄性熊貓交配，所以繁殖率偏低。
安安、佳佳活潑健康，多得一班愛心爆棚嘅護理員每日悉心照料，變身護理員嘅你，究竟點樣照顧大熊貓？第一個步驟係──清潔！唔係幫熊貓洗白白，係先清潔自己，先着醫生袍，再用消毒梘液洗淨雙手，戴上手套，出入通道要喺消毒藥水上面企3秒，徹底消毒鞋底。
第二樣要學嘅係幫熊貓準備食物，除咗水果、竹葉，安安同佳佳最鍾意食高纖「菠蘿包」，因為蛋白質豐富兼容易消化。其實「菠蘿包」本身成份同高纖餅乾無分別，只不過經過加工，用餅乾粉末加水攪勻，放入蒸籠蒸大約30分鐘，蒸完個Look同真正菠蘿包差唔多。
準備好「菠蘿包」，終可一嘗餵飼熊貓滋味，但大熊貓始終係野獸，為保安全，要隔住塊玻璃進行。駐場護理員會敲打三角鈴引大熊貓過玻璃附近，大家只要將餅乾放入管道，大熊貓就會自己攞嚟食。
細妹嘉嘉掛住睇熊貓，塊餅乾放咗喺管道中間，唔上唔落，搞到安安非常暴躁，不停敲玻璃，當堂嚇嘉嘉一大跳。
最後係清洗竹葉，清洗完再磅吓竹葉有幾重，之後踏足大熊貓平日生活嘅人工小山坡，喺唔同位置放上已經清洗乾淨嘅竹葉，見到玩具，一樣可以放入高纖餅乾，等安安佳佳可以邊玩邊食。難得可以踏足小山坡，放竹葉嗰陣有咁慢得咁慢，邊放邊漫步。
大熊貓好懶，每日要瞓10小時，又好大食，每日要花14小時進食，平均2小時就要食一餐。雖然同熊貓共進早餐時，佢有佢哋喺小山坡享用新鮮竹葉，你有你哋喺長廊上歎中西式早餐，但用膳時間有足足1小時，食物任食唔嬲，可以舒舒服服慢慢歎，食飽狂影佢哋沙龍都無問題，況且共進早餐時段大熊貓園會閉館，暫時唔畀其他遊客進入，影相唔使同人迫。
嘉嘉：「原來安安好大隻㗎，最好玩係近距離餵佢哋食餅乾，連佢身上啲毛毛都睇得好清楚，返到學校一定要同學仔分享吓。」
食完早餐咪咁快走，玩埋同熊貓有關嘅免費工作坊，位置就在大熊貓園側，小朋友可以發揮無限創意，同爹哋媽咪一齊製作熊貓手工藝如熊貓帽子、熊貓公仔、熊貓紋身等等。
喺4月3日至25日，公園多個小食亭推出10種新美食，大家可以試吓大熊貓故鄉──四川嘅地道菜，玩到肚仔餓，試番個四川肉碎担担麵（$25）同麻辣牛𦟌（$18）都唔錯。
海洋公園
地址：香港香港仔
查詢及預約電話：28738650
入場費：成人$180，3至11歲小童$90，3歲以下及65歲以上免費
交通：金鐘地鐵站B出口乘629城巴直達，成人$12，小童$6。
活動名稱：榮譽大熊貓護理員
地點：大熊貓園
日期：4月3日至25日（8:00am至10:00am）
每日名額：4名
收費：$200，包早餐$265
活動名稱：與大熊貓共進早餐
地點：大熊貓園
日期：4月3日至25日（9:30am至10:30am）
每日名額：40名
收費：$130