台灣大選引發憲政危機，台股幾乎跌停板，雖然有基金建議可趁低吸納，但台灣人會唔會咁諗？有朋友投完票返港，見面第一句就話台灣呢鋪真係玩完，人同錢都會加速流走。
噚日港股大跌，主要係受美股弱勢，以及台灣政局唔明朗影響。不過，台灣資金外流，香港唔多唔少都會受惠，話唔定愈來愈多台灣人嚟香港做投資移民，成為香港樓市另一支生力軍。𠵱家豪宅樓價已升到天高，消化完一輪，若果唔落得，中小型住宅就會接力而上。
恒指最低跌見12529，暫時喺12500呢個支持位喘定，收12550，大跌239點，期指繼續低水。大市今次調整，恒指已跌逾1500點，即使外圍再大散，港股跌多二三百點，都會出現一次反彈，樂觀計上番13000，然後再試底。
樓市若一路有新水注入（除台資外，北大人亦可能會繼續送禮），地產股今年可看好，今次大市調整，正係低吸機會。大行當中，最樂觀係瑞銀，除長實（001）係中性評級外，其他如新地（016）、恒地（012）、新世界（017）、九倉（004）同信置（083）等，都建議買入。本欄早前推介的大酒店（045），在近日跌市中表現強勢，可繼續持有，目標價7字頭。
噚日有消息，文化傳信（343）同IBM合作發展的網絡計算機同稅控機，短期內將推出，而集團的「飛龍CPU」及主板機，接單情況亦超乎理想，文傳在經歷多年虧損後，將會大翻身，樂觀估計04年度（3月年結）已可轉盈。
「飛龍CPU」係文傳副主席朱邦復研究5年的心血結晶，呢套微型嵌入式中文造字引擎，可內嵌於不同類型的處理器中，係進入中國市場必備的競爭條件，而集團在研發成功「飛龍CPU」後，亦正式進入收成期。文傳中人亦好有信心，就係「嚴冬過去，春天來臨」。
文傳係一家出現轉捩的公司，2月中股價雖大升1倍（由0.3元升到0.6元），但由於其盈利係屬於「可大」一類，目前其升勢相信仍在初階，中線股價有機會在現水平再翻一番。
郭兆誠