新款數碼相機攻勢真係未停過，繼各大廠推出新款DC後，卒之輪到三洋加入戰團，推出三色新DCXacti（DSC-J4），猶記得當年J系列首次玩粉紅色機身，市場出奇受落，多次返貨依舊斷市，新機當然唔少得呢招撒手鐧，一口氣推出黑、銀同粉紅色機殼，真係男女用家市場都照顧到。DSC-J4採用400萬像素CCD，賣點有0.8秒極速開機，比CASIO嘅1秒開機重要快。而較特別係其針對打印A3大尺寸嘅模式，懂得自動轉換相片解像度至800萬像素，原理當然係以插補方式填滿，即係俗稱「谷」出嚟，不過效果應比Printer自行放大好，尤其係對圖像唔係有太深理解嘅用家，都可較易印到大大張靚相。
記者：徐影龍
官方網址：