台灣總統大選後，政局不穩，台股急挫6.7%，照計台灣政局不足以影響港股表現，但噚日好友消失得無影無蹤，淡友稍為沽少少貨，已將大市質到接近12500水平，恒指收報12550，跌239點，成交僅138億元。Cookie話，以往台灣出現震動，資金好鍾意流入香港，但今次港股跟住跌，唔知台灣資金流咗去邊？
中芯（981）愈跌愈肉酸，阿虎見到一波於2.10元出手接貨，但接咗一陣已走人，幸而股價冇進一步下挫，全日收2.10元，跌9.7%，成交達5.8億元。不過，中芯市值大，市場憧憬此股會被納入大摩指數成份股，屆時基金會追隨吸納，所以中芯不失為博反彈之選。另外，最值得注意係中芯已跌至2.10元，到咗法國大戶心目中嘅買入價。
搞財經網站嘅駿陸（8206）創辦人之一陳永陸早前沽9700萬股，即24.25%股份畀國內電子商人傅承期，每股作價0.103元，近千萬元袋袋平安，陸叔真係發大財。消息曝光後，駿陸噚日一度急升近80%，高見0.10元，收報0.08元，但成交只得13.68萬元，其他小股東想出貨相當困難。不過，據聞新股東將有大動作，唔知會否高價提出全購，益埋小股東呢？
聯想（992）本周請傳媒北上，話有重大發展公布。據ｉ師傅所講，可能同一啲業務合作計劃有關，對公司盈利冇太大實質貢獻，股民毋須抱太大憧憬。聯想噚日跌3.4%，收報2.80元。
阿虎