筆者同H成日都怨一剔牌返貨唔夠「齊」，潮鞋就成籮成籮咁嚟，我哋最鍾意嘅籃球鞋就影都冇。可能俾我哋嘈得多，結果今個月我哋啲籃球鞋迷就有一個「瘋狂三月」。
由ProfessorK讚到天下無敵（詳情可上kicksology）嘅VC3新色打頭炮，之後再有巴克利「三響炮」；個人認為以費城版AlphaForce最正，因為細個見過巴克利着住佢係76人入樽入到嘭嘭聲，所以特別有感情；而且隻色重靚過同期嘅AirMax2CB好多。
除咗復刻，之前玩限量嘅「夏娃池」響今個禮拜三亦有貨返，不過隻色就麻麻喇。至於全世界Jordan迷都「猴住」嘅AJ19，亦會係禮拜五同AJ2一齊「出世」。之前成日喺niketalk聽人講AJ19嘅「劍擊面罩」點樣跟你動作蠕動，上jumpan23.com睇好鬼正，梗要一出即買！睇嚟今個月都要咬麵包度日喇。
不過讚還讚，一剔牌個官方網就真係亂咗啲，好似對Alpha force同AirMax2CB擺明係籃球鞋，都無厘頭放咗去othersports度，搞到搵餐死。點都好，今日筆者就會收到AJ19，想知有幾好着的話，記住留意下星期我同H精心炮製嘅「波鞋Guide」之AJ19攻略喇！
文：仙道彬
e-mail: