趙頌茹（阿Yu）日前與友人欣賞電影《大魚奇緣》首映，她進場後並沒有遵照戲院指示關掉手提電話，加上她不停大聲講電話，騷擾了其他在場觀眾。昨日阿Yu透過助手解釋，當日接到公司緊急電話，故不可不覆機，她亦對此事感到歉意。
王賢誌昨日為商台主持節目《茶煲裏的查篤撑》，他批評新一輩藝人待人處事或行為都很奇怪，又指日前前往欣賞電影《大魚奇緣》首映時，有女藝人在戲院中不停講電話，影響其他觀眾，儘管王賢誌未有透露該女藝人身份，但據記者所知，該女藝人正是趙頌茹。
王賢誌昨日在節目中說：「我早一、兩個禮拜去睇首映，見到好多artist，坐喺我隔籬嘅係一位樂壇新人，係女仔嚟嘅，咁傾咗幾句就開場，但原來佢冇閂過電話，咁喺開頭嗰十分鐘，佢電話起碼響咗兩、三次。」
王賢誌續道：「講真我覺得唔係咁好意思，我唔知會唔會以為係我個電話響，佢唔單止由得佢響，佢真係好大聲咁喺度講，我重聽到有人『囗』佢。我當時諗你去得呢個場合，會撞到好多同行嘅人，你都係呢行一分子，你唔單止影響自己，重影響人，人哋會覺得乜啲藝人咁冇品㗎！之後佢睇咗十幾分鐘就走咗。」
適逢當時亦有記者在場欣賞《大魚奇緣》，發現當晚在戲院內不停講電話的正是阿Yu，她甫入場已大聲跟同行友人說：「是但，坐邊度都得啦。」當他們坐下後，阿Yu又以尖銳嗓子向友人說：「我要食爆谷，你幫我買，我出唔到去，我畀錢你。」阿Yu的友人即代她買爆谷和飲品，直至電影播放了不久，阿Yu的電話響了兩次，她傾了接近五分鐘，有觀眾即時示意她細聲一點，後來阿Yu索性中途離場。記者當時還聽到附近有一中年男人說：「黑麻麻，都化咁濃妝，都唔知乜嘢心態。」
記者昨日致電聯絡阿Yu，唱片公司代她回應說：「當晚係公司urgent搵佢，但係佢個電話太細聲，所以不自覺講大聲咗。因為身為藝人，公司搵到佢，佢一定要回覆。佢當晚對其他人造成騷擾，覺得唔好意思，喺度講一聲對唔住。」