喜劇《情迷索瑪莉》男星賓史迪拿（BenStiller）同《贖金之王》系列主角奧雲韋遜（OwenWilson）呢對老友記，唔經唔覺已經合作過六部電影，最近佢哋喺新片《孖咇勇探》又再次擦出新火花！
《孖咇勇探》改編自七十年代美國紅極一時嘅同名警匪電視劇《Starsky&Hutch》，當年劇集瘋魔萬千觀眾，一對唔依法規、最冇紀律嘅警察拍檔齊齊捉賊，搞笑形象深入民心。不過今次電影版就係電視版嘅前傳，解釋兩位警探點解會走埋一齊，而賓史迪拿同奧雲韋遜能夠扮演自己嘅童年偶像，都感到好光榮，所以點都要施展渾身解數。
賓史迪拿飾演嘅「陀槍大師兄」杰佬，同奧雲韋遜所扮演嘅「新紮六師弟」Fit佬各有千秋，但同時亦各有死穴。杰佬因為太過搏命頻頻嚇走拍檔，而Fit佬雖然天賦破案直覺，但危險任務唔使預佢，零舍縮骨，老細決定安排佢兩個成為搭檔，互補不足，兩個亦由面左左變成最佳拍檔，一齊掩飾身份捉大毒梟，搞出唔少笑話。而呢對勇探已奉命復活節檔期喺香港「行咇」。