非常佩服陳可辛、鄭丹瑞、彭氏兄弟及編劇JoJo的《見鬼2》，無論是意念、拍攝、製作、包裝都是國際級的水準，尤其是《見鬼2》貨真價實地突破了語言障礙，全世界觀眾唔聽對白都睇得明。
平時撞鬼都已經夠陰功，大肚婆大住個肚都重要俾鬼搞則更淒涼。《見鬼2》的意念簡單過簡單，大肚婆見到鬼，又驚啲鬼搞自己個BB，於是又要驚又要反抗，由於劇情夠簡單，編導可盡情利用攝影、燈光、音效、節奏、演繹來嚇觀眾，觀眾感受是唔止驚餐飽、嚇鑊金，散場時直情係感到不安，但觀眾睇呢類片付出真金白銀就係想貼錢買難受，睇《見鬼2》，絕對買到。
李心潔憑《見鬼》榮登影后寶座，《見鬼2》的舒淇狀態大熟大勇，全片對白不會超過幾張紙，大部份時間都是靠「演」去帶動觀眾情緒，舒淇用表情及健美的身體語言去告訴大家甚麼叫「哀莫大於心死」、「毛骨悚然」、「心膽俱裂」、「絕望無助」及「同歸於盡」。原麗淇是來年最佳女配角的大熱人選，片中出現的篇幅雖不多，但那茫然的表情、失神的眼睛、豆大的眼淚，還有那發自心肺、傷痛欲絕的幾句對白，令我看得入心入肺，有排都唔會唔記得。
彭氏兄弟是好導演，他們懂得找好演員，亦懂得導好演員，編、導、演配合得無話好說。