「下一屆我出嚟啦！」
舒淇譏台選兩黨互「媽」

舒淇前晚出席新片《見鬼2》慶功宴時，表示日前台灣總統大選，她都有往投票，對於選舉結果引起混亂，她笑說：「下一屆我出嚟啦。」舒淇更批評所謂選舉只是你「媽」我，我「媽」你。

舒淇、陳可辛、彭順及彭發兄弟和曾志偉等，前晚在尖沙嘴出席新片《見鬼2》慶功宴，慶祝該片在香港上畫四天有約四百多萬元票房，而泰國和新加坡則分別約一千二百萬和四百萬港元票房，成績理想。

「我覺得好好笑」
日前台灣總統大選，舒淇有往投票，她說：「我支持邊個唔方便講，唔理邊個當選都好，當選嗰個應該好好哋做應該做嘅嘢。」問舒淇可支持重選時，她說：「有啲人會話唔公平，但輸咗要有君子風度，政治嘢係咁，世界唔公平事太多，由得佢哋處理，除非我係總統，下一屆我出嚟啦。我覺得好好笑，由第一日開始唔係你『媽』我，就我『媽』你，今次都聽唔到有乜嘢政見。」
前晚電影公司在慶功宴現場安排了三名女子扮大肚婆倒薑醋給大家飲，然後掀起裙子，露出假肚寫上《見鬼1》、《見鬼2》和《見鬼10》，十分搞笑。問舒淇拍攝《見鬼2》可有難忘鏡頭，她說：「我難忘扮大肚婆跳樓嗰場戲，我企喺五樓天台邊等，喊咗好耐都冇人理。」

拍完不停發夢
舒淇續說：「當時我個肚好大，風又大，好驚失重心跳咗落去，最後用特技唔使跳，不過拍完都不斷發夢，都有諗自己係咪真係跳咗樓。」
此外，問導演彭順覺得女友李心潔在《見鬼1》跟舒淇在《見鬼2》中，誰的表現較好時，彭發說：「冇得咁比。」有人看《見鬼2》首映見舒淇跳了兩次樓，但實質只有一次，彭發對此說：「套戲出街得一次，有人鍾意睇舒淇跳兩次就兩次，一次就一次。」
而陳可辛正開拍電影《三更2》，他說：「日本部份導演係三池崇史，演員有長谷川京子，韓國部份導演係朴贊旭，演員有李秉憲，香港部份就未拍。」
採訪：陳梅香　攝影：林德雄