章子怡日前喺摩納哥同徐楓見過面，佢兩個一見面就好好傾，原來章子怡對徐楓嘅魄力十分欣賞，而徐楓又特別帶咗《潮州巷》嘅劇本畀章子怡睇，佢睇完後話好有興趣，徐楓於是打蛇隨棍上，即刻邀請佢拍呢部戲，而章子怡亦表示好有興趣拍呢部戲。
其實呢部戲最初係斟鄭秀文同古天樂做嘅，內容大致係講一對喺潮州巷賣滷水鵝嘅夫婦，由於老公變心，老婆斬死佢之後，重整埋做滷水汁㖭。但因為鄭秀文推咗，而導演陳果又忙緊搞其他戲，所以部戲就擱置咗。
噚日馮仁昭打電話畀陳果問關於呢部戲嘅事，佢話：「係咩！傾咗章子怡呀！呢排我忙緊第二啲嘢，都未有時間理呢部戲嘅事，等我問吓老闆先。」
張豪龍噚日喺天后為一種名為「冰堡」嘅保凍產品拍廣告，佢話對於今次拍廣告嘅酬勞非常滿意。至於佢家姐張栢芝喺北京因為被記者追訪而報公安一事，豪龍就話自己未知詳情，不過佢就話會聯絡家姐問吓究竟發生乜嘢事。
溫碧霞上年好少喺香港出現，原來佢成年都喺內地拍廣告、宣傳寫真集，不過個廣告同本寫真都唔會喺香港出，噚日溫碧霞去新城做嘉賓講扮靚，佢話：「今年我想留番喺香港，拍吓電影，因為拍得太多電視劇無挑戰性，我想拍幽默式嘅愛情片，重想同金城武、任賢齊合作。」
王從希、陳文媛（BoBo）同曹敏莉等，噚日喺將軍澳電視廣播城錄影節目《秀出美麗人生》，BoBo同王從希以嘉賓身份亮相，佢哋會喺日內加入瘦身行列，不過王從希竟透露有意收胸，佢話：「最想瘦係手臂，都想收吓個胸，着衫會好睇好多。」
薛家燕噚日主持節目嗰陣打電話畀羅浩楷，問佢病況，電話一接通便傳出一把精神奕奕、十分響亮嘅聲音，羅浩楷話：「心臟病真係好突然，佢會喺你休息嘅時候無聲無息咁侵襲你，平時我都有健身、跑步，都唔知點解血管會突然閉塞，真係死過翻生。」
鄭希怡（Yumiko）日前喺浸會醫院割除鼻瘜肉，手術成功，噚日下晝三點，戴上口罩同墨鏡嘅Yumiko離開醫院，然後一直奔往保母車，之後Yumiko嘅助手話：「佢冇事，醫生叫佢戒口啫！」
馮仁昭之前講過許冠傑（阿Sam）首新歌《04祝福你》MV會交畀無綫首播，點知播映日期一拖再拖。無綫方面最近終於做番啲嘢，重安排今晚七點半至八點嘅《娛樂大搜查》度首播；而呢首歌嘅MV係阿Sam自己剪輯同一手策劃，大家到時可以見到阿Sam之餘，重可以見到佢真係擺咗好多心機製作㖭呢！
