L公子、K公子呢個禮拜回港度假，記得佢哋去年九月中先去英國讀大學，喺一流名校讀得好過癮，一來冇乜功課做，全無壓力，二來兩人嘅成績甚佳，零舍輕鬆。L公子尤其巴閉，教授都俾佢嘅表現嚇咗一跳，朋友有子如此，世叔都覺得高興。
計吓數，九月中去英國，十二月中返嚟過聖誕，一月初返學，三月下旬又再回港度假至到四月中，乜咁多假期㗎？身在倫敦嘅肥仔K話：「今個學年最後一個學期由四月中至六月中，之後放暑假三個月。喺英國讀書爽過喺美國，美國大學行quarter（學季）制嘅，時間緊逼，可以講話透不過氣來，每個學季都有測驗、中期試、期末試，一啲科目重要交paper，上堂成日遲到或者缺席嘅，一定冇A攞，但英國學生就滋油咯，我啲同學周時失蹤，大學平時冇測驗，最緊要係交paper啫。」
如L公子者，成個天才型，到英國名校讀書就最啱，可以充份發揮，而且有時間領略英國、歐洲文化㖭，但如果係普通學生，到英國輕鬆過日，三年畢業，再讀一年攞埋碩士，都未必叻得過香港嘅大學生，唔怪得肥仔K嘅恩師畀電郵佢：「如果你要讀博士，一定要返嚟美國讀，去英國領略吓歐陸文化好嘞！」肥仔K最初大惑不解，眨吓眼又放假咯，佢先至明白恩師嘅苦心，係驚佢呢啲「非天才」喺英國讀到半桶水也，而且英國大學鬧窮，劍橋最出名嘅學院聖三一學院院長A.K.Sen都辭職走去哈佛，英國大學好難同美國競爭。