李奧費迪南決定唔再為自己停賽期再次申請上訴，一於叠埋心水坐「波監」。除咗跟操之外，佢將會訪港同香港球迷會面。
我求大俠收到消息，「紅魔鬼」球會官方雜誌香港版，繼去年九月請到曼聯名宿白賴仁笠臣後，遲啲會邀請李奧費迪南訪港，等香港球迷有機會同呢位英格蘭國腳近距離接觸，聽聞會喺五月初到埗。李奧早前上訴失敗後，決定唔再計劃第二輪上訴，寧願收拾心情，為下個球季準備好過。
我求大俠覺得李奧訪港，對球迷係一個天大喜訊之外，對李奧亦係好事；話晒香港有購物天堂美譽，李奧嚟shopping放鬆吓心情，都應該係好事。
南美洲及亞洲世盃外圍賽下周中舉行，球會同國家隊經已為爭球員傾數，孫繼海同G施華就唔踢今周英超聯，準時歸隊，好似阿仙奴今周大戰曼聯，領隊雲格都話留唔住G施華無晒符。不過，我求大俠覺得球會同國家隊早早達成協議係好事，起碼啲球員可專心應付比賽。
博洛尼亞前鋒薛洛尼啱啱射破布雷西亞大門，響意甲累積一百八十七球。唔知係咪受同輩巴治奧嘅退休決定所影響，佢賽後都話考慮踢埋今季掛靴。我求大俠記得當年佢同老友輸賭自己可以破二百大關，𠵱家多數輸囉。只因佢近季成日受傷，要突破二百，真係畀多季佢都可能……
當初中國新星董方卓加盟英超班霸曼聯時，唔少人覺得中國足球向世界邁進一步；不過「紅魔」隨即將董方卓借畀比利時下游球隊安特衞普，咪話唔心淡。唔止我求大俠咁諗，喺新一期亞洲足協嘅官方雜誌《亞洲足球》入面，都話若董方卓嘅曼聯夢真係破滅，係亞洲足球嘅悲哀！
前晚西甲聯桑坦德對切爾達開咗個有二百零一倍嘅四比四大冷膽，肯定係近期足智彩所開最冷嘅一個。呢隊波家吓為搶分護級，場場進取但後防又靠唔住，所以波膽大到無倫，齋講佢哋今個月四場聯賽已出過輸二比四、一比五同埋前晚和四比四波膽。想博大冷嘅球迷要吼實喇！