市場競爭激烈，發展商推廣花招層出不窮。好似長實同新地長沙灣宇晴軒，第二期就快推出，用歐陸風格做賣點。長實特意為樓盤整咗個網頁，介紹物業資料同最新消息外，重有個「宇晴軒之法國名勝知多少？」網上遊戲，參加者回答幾條簡單問題，留低個人資料，就有機會贏得五十萬旅遊獎項。
獎品係四人六天法國巴黎藝術文化之旅，同埋一萬蚊現金消費，可以搭頭等機，同住巴黎五星級四季酒店，重有專人帶你暢遊凱旋門、羅浮宮等名勝，價值五十萬，名額只得一個。網址www.the-pacifica.com.hk。
發展商話，遲啲會有第二輪推廣，但一定要參加咗第一輪，先至合資格。為讓傳媒感受樓盤嘅歐洲風情，噚日搵嚟法國廚師，親自下廚，請老記食法國餐。
復活節就快來臨，又係各大商場租戶黃金檔期，作為大業主，梗要搞啲活動配合，信和率先披露，九個商場有活動。最矚目係大角嘴奧海城，場內會有個用三十萬塊「樂高積木」砌成十二呎高嘅「積木巨蛋」，重會請嚟藝人古天樂同梁詠琪，為「奧海城巨蛋夢樂園」主持開幕禮。
屯門市廣場，就有全港首個芝麻街魔法學堂，由資深魔術師，教一百個小朋友玩魔術。
信和又向內地自由行客招手，舉辦「復活節開心購物遊」，邀請內地金融、媒體同通訊等知名企業屬下員工參加，由廣州直達信和旗下商場，重安排埋普通話大使，帶領自由行客逛商場購物。消費滿指定金額，會有多項優惠，如退回交通費、送禮品、半價換手提電話。全日消費最多嘅，重可以獲贈數碼機㖭。
有能力換樓，都會選擇大啲嘅單位，但要搵啱唔易。
中原唐凱澤話，一個外區換樓客，用四百七十四萬五，買入將軍澳蔚藍灣畔七座高層D同E室，打通做相連戶，合共一三三五呎。另每單位附三十七呎露台及工作平台。
第七座最大嘅B室，都只係一二六八呎，唔夠呢個自製相連戶大。
至於成個樓盤能夠大過佢，就只得第三座複式，一三八五同一六五五呎。
市況好轉，又多番撻定、賠定。長沙灣最近就有宗工廈退定再租，唔使賠錢，重租得高咗㖭。
美聯李麗嫦話，青山道五百號百美工業大廈地廠，六千二呎，業主年初同食品公司簽兩年約，月租七萬。但業主唔能夠依時交舖，租客退租，業主退還定金。
間廠好快就有新租客洽租，做汽車維修，結果以每月七萬五租出，重簽咗三年約，共收二百七十萬。
蘭西
電郵地址：
