八方去基本法研討會，見到前草委兼現任基本法委員會副主任黃保欣，佢老人家自從舊年連任唔到做人大代表之後，已經好少露面，八方問佢最近有冇去北京？佢話有去列席人大會議，重猛咁讚總理溫家寶為人老實，信得過。
保欣叔係福建人，一向都好愛國，佢當年深得中英雙方嘅信任，喺中英就香港政制發展爭拗，九一年應有幾多席直選起過一定嘅橋樑作用，令雙方最後達成共識。
時至今日，香港特區又同北京就○七年可唔可以一人一票選特首，○八年可唔可以立法會全部由直選產生爭論，八方問保欣叔點睇，會唔會復出做中間人？佢笑一笑，話會掂嘅。
後來八方見到保欣接受訪問，話自己見到三大護法咁老都來港，自己好似做得唔夠，原來呢位八十一歲嘅老人家心中有數，只係平時唔多講自己嘅睇法，唔使多講，就係香港目前未適合全面普選。
傳真︰2623-9278
電郵︰