台灣前日舉行新任總統選舉，結果現任總統陳水扁和副總統呂秀蓮險勝，香港娛樂圈中人經常到台灣工作，所以對選舉結果亦十分關注。
身為全國政協的汪明荃，前晚在無綫將軍澳電視廣播城演出《博愛歡樂傳萬家》時說：「我睇得好緊張，覺得槍擊事件好奇怪，連戰同宋楚瑜提出選舉無效，事件發展好戲劇性。台灣選舉文化好特別，不過全民投票應該尊重，因為話晒一人一票。陳水扁被槍擊一事好複雜，咁多人有疑慮，都要解答。連戰同宋楚瑜都幾好，中央易接受啲，我唔會有太多意見。」
而薛家燕昨日在上環拍攝劇集《皆大歡喜》外景，她說：「我覺得台灣選舉有啲戲劇化，阿扁中槍淨係影得個肚，又會唔影大頭，我覺得正常唔會影個傷口畀人睇，總之就疑幻疑真，雖然我唔熟佢哋嘅政綱，但我都以為係連戰會勝出。」問她可會擔心引發兩岸紛爭？薛家燕說：「無謂搞呢啲，啱啱先經濟繁榮番，應該捱得過嘅。」