早排周永恆（阿Roy）喺青衣屋企附近俾五個青年圍毆，有消息傳出話當時佢嘅緋聞女友趙頌茹（阿Yu）都在場，阿Roy係因為英雄救美先至出事，雖然事後阿Yu唔認自己在場，但佢兩個係咪拍拖，大家心知肚明啦。
不過阿Roy同阿Yu就似乎膽生毛，呢頭遇上街頭霸王，嗰頭又拍拖行廟街，呢次佢哋就一齊戴上綠色口罩嚟掩人耳目，只可惜呢啲只係鴕鳥政策，阿Yu成五呎九咁高，係人行過都對佢眼望望啦！
話說上個禮拜三凌晨十二點幾，有人就見到阿Yu同阿Roy一齊戴住口罩，由廟街頭一路行去榕樹頭嘅方向，當時阿Roy着住件橫間大T恤，負責行頭開路，而頭戴賊仔帽、孭住個超級大袋嘅阿Yu，就鬼鬼祟祟尾隨其後，不過阿Roy每行幾步就擰轉頭望吓阿Yu，佢哋周不時重會喺啲小檔攤前停低睇嘢。
馮仁昭覺得阿Yu同阿Roy男未婚女未嫁，拍拖係好正常嘅事，愈係懶神秘就愈引人注目，倒不如大大方方好過。
麥浚龍（Juno）日前接受港台錄音訪問，被問到去年涉及嘅「舞影行動」，佢話：「始終係負面新聞，但我都唔知發生乜事。」
坊間一直指佢嘅父親經常喺金錢上幫助佢，Juno否認話：「咁會扼殺我嘅努力，佢冇出過錢，只係精神上支持我，我唔想人哋諗歪。」至於特別照顧佢嘅陳少寶，Juno話：「我都好擔心佢，始終係佢帶我入行。」
許秋怡和王書麒兩公婆噚日喺尖沙嘴出席宣傳活動，秋怡近期因要照顧BB及曾患乳癌的媽媽，搞到精神好差，噚日重發燒。
秋怡話：「雖然咁辛苦，但都要撐住，如果自己都唔樂觀啲好易會患上抑鬱症，所以有時深夜我都會同老公傾訴吓，有時重會喊出嚟發洩。」
徐熙媛（大S）徐熙娣（小S）兩姊妹同吳佩慈日前為好友范瑋琪喺台灣一間泰國餐廳慶祝生日，重打扮得好靚到場。大S一身白色打扮，而小S則着咗桃紅色長裙，盡展身材優點。而「壽星女」范瑋琪就好似「白雪公主」咁，所以都冇話邊個搶邊個鏡。
