台灣選總統，結果唔對路，加埋美股唔生性，今日港市窩輪，將屬Put輪天下。恒指Put輪會係焦點之一，9213成為呢類輪中主角。
9213喺5月杪到期，輪價11.6仙，溢價4.5%，槓桿率22倍，一日成交分分鐘相等於發行量一半甚至一倍。講波幅，最大嘅可能係9243，呢件下月杪到期，溢價4.7%唔低，槓桿率59.2倍爆炸力勁到飛起，當然殺傷力亦唔講得笑。穩陣少少炒恒指Put輪，可以揀9602，輸蝕在槓桿率得7.5倍，着數在8月先至夠鐘，時間因素有利，而溢價4%亦唔離譜。
炒恒指Put輪或其他Put輪，要留意台灣局勢，若然路轉峯迴，最好速速離場，至於是否即時反手買入Call輪，則又要考慮，要炒嘅話，或者可以只做即日鮮，即日平倉，過夜唔知會發生乜事，槓桿率大嘅短期輪，可能係Call可能係Put，一夜之間可能變化二三十個巴仙。唔想食驚風散，最好袖手旁觀。
市況唔妥，公用股成為避風股，中電（002）、港燈（006）、中煤（003）都有錢掟落去買，佢哋嘅Call輪，上周六已講過，且都係低溢價甚至負溢價。短炒一下OK，坐盤坐得耐要諗埋正股已經升咗唔少嘅因素，咪貪勝不知輸。
過多一陣，就到4月，4月及5月到期嘅藍籌輪，時間因素愈來愈不利，小心控制風險。
章盛