阿仙奴搞掂保頓後，唔單止繼續喺英超拋離車仔九分，重平咗利物浦喺八七至八八年度，以及列斯喺七三至七四年度聯賽開季連續二十九場聯賽不敗紀錄，不過唔好話我求大俠潑冷水，呢啲數字隨時會變成壓力！
阿仙奴嘅最新英超奪標賠率熱到去一點○四倍，即係話一蚊雞贏得四仙！但如果睇吓嚟緊嘅波，真係有啲為佢哋擔心。呢個禮拜三喺歐冠盃八強鬥完車仔後，四日之後響英超大戰曼聯；然後四月初再喺足總盃四強大戰曼聯，之後歐冠盃再碰車仔。
總之呢兩個宿敵隨時做攔路虎，一旦阿仙奴有乜𠵱郁，破唔破聯賽紀錄係其次，咪同前排「紅魔」或者目前皇馬一樣洩咗度氣，衰開就衰……呢啲真係要睇阿仙奴球員造化啦！
查爾頓領隊古比士利指摘如果唔係紐卡素中場羅拔插水博十二碼，佢哋唔會輸一比三；而紐卡素領隊卜比笠臣話會睇番賽事錄影帶及同羅拔傾吓，如羅拔真有咁做，定會向佢作出處分。老笠一向公正嚴明，而且好注重球員紀律，所以我求大俠信佢一定可以畀古比士利一個交代。
雲達不來梅嘅巴西前鋒艾列頓對國際足協唔畀佢入籍卡塔爾，感到非常憤怒；而佢重話係德國人喺度搞小動作，所以威脅要離開德甲聯。但係，我求大俠就認為佢得個講字，事關佢啱啱先同史浩克04簽約三年，重會喺呢個夏天過檔；如果佢想走，除非攞嚿錢出嚟贖咗份約。
幫荷蘭出線歐洲國家盃決賽周嘅雲尼斯達羅，好大口氣咁話，荷蘭教練艾禾卡特應以佢為首去建立球隊。我求大俠唔怕得罪講句，如果佢咁醒，曼聯𠵱家就唔會喺英超落後榜首阿仙奴十二分，兼重喺歐冠盃出局啦！荷蘭名宿告魯夫講得冇錯，雲佬同朗拿度、亨利比，重未夠班。
柏林一間電台講笑咁話，如果拜仁球員肯喺對哈化波擺烏龍，就可得一百萬歐元；拜仁結果因舒韋恩史汀加喺禁區犯規判極刑，俾哈化迫和一比一。史汀加賽前曾笑說睇吓邊個會做到，𠵱家佢雖冇擺老烏，但間接幫哈化攞一分，唔知柏林間電台會唔會打個五折畀五十萬元佢呢？