食物唔夠鹹？落鹽囉，想食清蒸海上鮮？叫阿媽落街市買囉，鹹魚呢？點醃製㗎？不過你又有無諗過，究竟鹽係點嚟嘅呢？香港漁民又用乜嘢方法捕魚呢？只要入大埔船灣淡水湖老虎笏，你就可以同時體驗做鹽、捕魚同醃製鹹魚嘅樂趣。
記者：陳震霖
攝影：陳陶鈞
模特兒：Kiko、Yan（Space2）
鹽係海水蒸發後嘅結晶體，理論上就咁𢳂桶海水放喺太陽底下暴曬，鹽就會出現，不過呢個方法太嘥時間，唔符合經濟原則，加快海水蒸發速度，最好方法當然係用柴火煲鹽。
話明用柴火煲鹽，生火前當然要到附近叢林執柴，再鑽木取火，成功透火勁煲30分鐘，大鐵桶裏面嘅海水慢慢蒸發成鹽，鹽一開始乾身，就可以用鑊鏟將鹽炒勻，再等15分鐘，天然海鹽面世！因為無經過化學漂白，鹽身唔夠市面袋裝食鹽咁雪白，但話晒自己一手一腳製造出嚟，嗰種成功感非筆墨能形容，煮完記得攞返屋企畀阿媽煮餸調味，睇吓係咪鹹啲。
做鹽DIY
西貢出名多紅樹林，估唔到老虎笏附近大小島嶼都有唔少紅樹，木欖、白骨壤、水筆仔等舉目皆是，如果風浪唔大兼潮退，大家重可以坐艇登岸，近距離一親紅樹林。不過睇還睇，千祈唔好踐踏泥土上嘅氣根，離開前亦唔應該遺留垃圾，破壞美好自然生態。
欣賞完紅樹林，出海，體驗漁民生活。究竟漁民點樣捕魚嘅呢？方法有二，分別係「刺網法」同「長籠法」。前者係五六十年代常用捕魚方法，專捕捉接近海床嘅魚類，漁民將50米長魚網橫放海床，當魚嘗試穿越網孔，細密網孔就會勾住魚鰓，好處係淺水海域一樣捉到魚，又唔會好似拖刮海床嘅「拖網法」咁嚴重破壞生態。
香港漁民𠵱家多數用「長籠法」將60米長長籠順住海流橫放海中心，等各類海產以為長籠係洞穴，戇居居游入去，好處係方便兼成本較低，今日放低長籠，隔日有收成，壞處係容易收集到石頭同雜物。
平時阿媽都鍾意蒸番條鹹魚送飯？啱嘞，咁多魚穫又咁啱煮完鹽，就順便學埋點樣自製鹹魚，拎返屋企慢慢曬，孝敬阿媽。
由大尾篤水上活動中心行至老虎笏，步程快的話，只需3小時，沿途必經2公里長嘅船灣淡水湖主壩，唔講唔知，原來船灣淡水湖係全球第一個海中興建嘅水塘，好架勢。
行主壩，兩邊風景一動一靜，一邊係風平浪靜嘅淡水湖景，一邊興風作浪嘅船灣海海景，目不暇給，過副壩，出現小山坡長牌墩，爬上山坡，景象豁然開朗，俯瞰赤門海峽，波光水影，風景就靚到不得了。
交通
去程：大埔墟火車站乘75K巴士（$4.7）到大尾篤巴士總站。
回程：大尾篤巴士總站搭75K巴士（$4.7）回大埔墟火車站。
老虎芴香港珍珠養殖場
地址：船灣淡水湖老虎芴
電話：葉先生93725707
做鹽捕魚之旅
旅行社：巨人假期
收費：每位$188，包午餐、導師費、器材及來回老虎笏至大尾篤2程專船接送，自行步入老虎笏則減$30。
時間：10:00am至5:00pm
查詢：27399786
註：4人成團，3日前預訂。