有居屋王之稱嘅「紅灣半島」（簡稱紅灣），自政府賣斷業權之後，落入新鴻基地產、新世界集團之手。兩大財團嘅初步構思係將紅灣拆晒，重建為「豪宅」形式嘅私人屋邨，預備再投資二十億元，補地價條數未知住，但鄭公子話：「理論上，唔使補啩。」
議員Y聽到新聞之後，為之媽媽聲，慨嘆：「孫公呢次俾人刮到應，人哋買咗，再拆，再起，仍然計到條數賺大錢，證明：（一）居屋霸靚地，浪費社會資源，不能地盡其利；（二）政府完全唔識講價，俾人㩒住砌；（三）拆樓造成大量廢料，浪費兼唔環保。做問責局長，如此吃眼前虧，你話怎麼辦，怎麼辦！」
禍源當然係八萬五，房委會當年為咗邀功，向政府搶咗幅靚地，到𠵱家，啲後遺症仍然未清除。左丁山聽議員Y講完，問測量L點睇，測量L猛咁笑，佢話：「一啲知情人士話畀我聽，紅灣唔拆咗再起，好難賣得高價。因為（一）樓宇質料曳，唔合格，同私樓差好遠；（二）個則好騎呢，屎渠唔係喺外牆，而係在屋內，就喺客飯廳嘅牆壁，食飯時就會聽到怪聲，一旦住耐咗，臭味易外洩，你話如果維修工人嚟你個廳修理屎渠，你怎麼辦。所以知情人士話，費事第日俾買樓人士鬧餐懵，拆咗再起就最乾手淨腳！」左丁山聽到為之愕然，如果係咁，搵鬼買咩，但將未入住嘅新樓全部拆晒，怕且係一項世界紀錄，亦係世界性花邊新聞，CNN訪問孫公之時，睇佢點樣答。