YOHOTown賣咗成年，𠵱家差唔多賣晒咁滯，發展商新鴻基地產應該可以鬆一口氣之餘，加上樓盤估計今年第三季都可以入伙，咪開始諗諗同啲業主搞吓同樂日，輕鬆吓囉。
噚日就由新地嘅蘇仲強帶隊，安排咗500位YOHO業主同埋佢哋嘅親友，去咗元朗錦田鄉村俱樂部玩咗大半日。
大家除咗喺大自然環境下燒烤外，新地同啓勝管理重諗咗多個遊戲同啲業主玩。其中一個遊戲，就係叫業主自製健康沙律，得獎者可獲送MP3機一大部；評判係之前承諾咗做「YOHO小廚星級顧問」嘅飲食專欄作家歐陽應霽。
蘇生話，搞今次活動，主要係希望YOHO業主喺入伙前，可以同街坊鄰里先認識認識，第日都好傾啲。
而且佢透露，呢啲咁有益身心嘅大型活動，遲啲重會陸續有嚟。
一直爭議多多嘅西九龍文娛藝術區，就連係咪批畀單一財團搞都嘈咗一大輪。蘭西最近聽到，原來政府早兩年搞嘅文藝區設計比賽，結果都有爭議。話說由NormanFoster奪魁嘅得獎作品，當日喺第一圈技術評選時已被foul出局，但唔知點解後尾又入番圍，仲攞埋冠軍同過百萬獎金㖭。
業界話當時政府同選委會冇公開過評選過程，完全黑箱作業，因此，當早兩日決定會盡量公開發展建議交畀政府做甄選嘅內容時，佢哋都好贊成。或者政府係怕再俾人鬧。
政府公布勾地表唔經唔覺都有幾個月，始終冇發展商成功勾到地皮出嚟，業界話照走勢睇，下個月都應該唔會有地賣。呢頭發展商話政府索價過高，嗰頭政府就強調唔會賤賣地皮，業界相信今次係雙方鬥耐性嘅遊戲，睇吓邊個忍唔住出手先。
佢話，發展商都係做生意啫，若果冇地皮補充，邊得嚟有樓賣呢？近期發展商已經喺私人市場搵地買。當然，政府若果重堅持唔到價就唔接納勾地申請，最終可能對賣地收入都有影響㗎。
台灣大選沒完沒了，寶島憲政陷入困境，香港同台灣關係千絲萬縷，最敏感嘅樓市股市都可能受拖累。噚日蘭西喺新盤售樓處訪問啲準買家，發覺大部份都話台灣政局動盪，並冇影響佢哋嘅入市意欲，充份反映出𠵱家香港人理智嘅一面。
自稱冇乜政治意識嘅王先生話：「除非台灣日後大亂到令樓價大瀉，如果唔係都唔會影響佢入市意欲。」事實上，噚日受訪嘅睇樓人士，大部份都話買樓最緊要係睇自己嘅能力同需要，如果真係要買樓，幾亂都要入市㗎啦！
樓價走勢向上，唔少租客轉租為買，市場擔心租客少咗，會對租務市場構成壓力。
不過，有業內人士話，其實啲長線投資者掃貨後，一般唔會咁快放售，通常都會搵人幫手做租管，最近呢方面嘅生意聽講唔錯，即係話租務市場冇乜受影響啦！
業內人士補充，𠵱家買樓收租，淨回報雖然只係得4厘，但投資者着眼喺樓價升值──即揸得耐就賺多啲，計埋就認真和味嘞。
講開租管，其實有錢買樓收租嘅投資者唔少，但聽到要傾租約重要幫單位搞裝修等工作，就耍手擰頭，所以租管生意至可以應運而生。
蘭西
電郵地址：
