標致307房車版　今夏登陸中國市場

來自法國嘅標致汽車（Peugeot），旗下一款307車系由推出至今，一直備受車迷追捧；及至最近，廠方又宣布會於今年夏季，率先喺中國內地市場推出四門房車版嘅307咁話。

記者：鄭達基

增設尾廂方便擺行李
呢款繼307三門及五門型號、307SW、307CC及307WRC後同系第六個型號嘅四門房車版，會係廠方與中國東風汽車合作生產，並於國內市場推出。
從外形而言，新車車首部份與同系其他型號相近，但改用上四門三廂式設計後，卻顯現出一份踏實嘅個性來；與此同時，新車闊大嘅尾廂，明顯要較一班同門師兄弟嘅尾廂容量來得更高。

車廂鋪排豪華實用
至於車廂方面，全新307四門房車版嘅鋪排與其他型號相近，全皆以豪華及實用為賣點，不但前後兩排座椅屬承托力甚豐嘅設計外，鑲有銀白框邊嘅中控台，重有齊各項設備㖭！
另一方面，廠方又為選擇新車嘅用家，提供有1.6及2.0公升嘅直4引擎作選擇，匹配5前速手波或4前速Sequential半自動波箱，性能表現不俗。