拍鬼片最緊要夠驚，無論係鬼喜劇、鬼愛情片或鬼咁得人驚的恐怖片，一律要驚，一齣唔驚的鬼片是把鬼片，不如唔好有鬼，總之有鬼就要驚。
睇鬼片最緊要夠驚，畀幾十蚊入戲院就係希望被嚇餐飽，戲院黑媽媽加上強勁音響效果亦好應該可以將觀眾嚇餐飽，故事反而係其次，意念最重要，一個簡單的意念便可衍生出九十分鐘的驚嚇氣氛，如果太着重用篇幅講劇情，反而令製作者分了心，亦令觀眾分了神理解故事，最好就係明啲唔明啲，由得掌舵者帶住觀眾情緒走，唔聲唔聲，嚇你一驚，趁唔為意，又嚇一鑊金，一齣鬼片只要嚇到觀眾一鑊或幾鑊金，觀眾散場便會四處傳口碑，話畀其他人聽齣戲有幾驚，自己又有幾唔驚，藉此顯得自己有幾型及有幾大膽。
如果肯定夠驚的話，男觀眾更會帶唔同嘅女觀眾入場睇戲，女仔驚到鬼殺咁嘈，男仔則泰山崩於前而色不變，你話幾英？況且睇咗幾次都知道晒邊個位係驚位，於是做好準備，準時將女仔一抱入懷。
日本的《午夜凶鈴》及荷李活的重拍版是絕好教材，荷李活的那齣將原版的所有犯駁或含糊的漏洞全部修補整齊，但偏偏就是太過工整，所以唔係好驚，不及原裝日本版甩甩漏漏更添恐怖氣氛。
鬼片的劇情是否完整並不是重要，最重要是夠驚。