呢兩日嘅大新聞，睇怕唔使講都係台灣總統選舉，噚日小初睇電視，見到當地市民咁激動，真係有多少擔心今日港股嘅表現。經紀黃話，即時波動或者難免，但對港股實質影響相信唔大，不如諗吓有乜嘢股票可以短炒重好。
經紀黃今日推介嘅股票，就係剛於上周公布業績嘅建滔化工﹙148﹚。證券界人士估計建滔今年陸續有搞作，如果唔係批股集資，就係搞分拆上市之類，總之就不愁寂寞。
建滔上周四公布截至2003年12月底業績，盈利4.72億元，末期息派10仙。由於建滔改咗年結日，所以未能直接同往績比較，但經紀黃話問過班分析員，佢哋表示好過預期。
建滔去年股價表現奇佳，兼夾批過股集資，但截至上年年底，淨負債仍高達16億元咁多，所以有需要諗計度水，建滔管理層財技甚高，單單睇佢哋喺證券投資方面嘅表現，就可見一斑，估計佢哋一定有計搞掂。建滔上周五下跌2%，收14.40元，成交股數僅18.6萬股，金額269萬元。
慕容小初