唔少女星都好樂意做化妝品嘅代言人，梗係啦，有人幫你扮到靚一靚，又有免費化妝品用喎，畀你都願啦。好似田中麗奈咁，佢十幾歲就出道，到𠵱家二十四歲，終於俾佢恨到做粉底Proudia嘅新廣告model，但唔知係咪因為麗奈個樣太細個，又少濃妝豔抹，聽講廣告商都未夠膽畀佢孭晒飛，依然用番做咗幾季代言人嘅上原多香子同麗奈拍住上。
我羅拉就睇過個廣告，雖然麗奈好刻意咁走成熟路線，聽講去到洛杉磯取景時，天未光就要求個化妝師開始幫佢整造型，可見佢對自己個look非常緊張。佢重唔理當時重係天寒地凍，着住件薄薄嘅onepiece喺泳池邊周圍行。啲攝影師話麗奈拍時都凍到頂唔順，自己嗌cut抹鼻水，聽到都戥佢慘。
之不過咁，事實上另一個代言人多香子雖然細過麗奈三年，但佢十七歲就拍超性感寫真集啦，所以佢喺廣告入面不經意嘅香肩一露，麗奈就即刻被比下去喇。
此外，田中麗奈前日同妻夫木聰、池囗千鶴等人出席《GO!大暴走》導演行定勳執導嘅新片《日出前向青春告別》個首映禮，呢套片喺今屆香港國際電影節入面亦有得睇，不過啲飛就差唔多賣晒。