港台民主勁熱大互動，唔知點解，呢一排無論係台獨、連宋、宣傳香港人抗爭，都時興手牽手，自從特區文革掀起之後，香港民意反彈第一擊。保護維港大行動，喺「十點前特首」兼電波強勢領袖鄭大班率領之下，係咁意吹吓雞，咁又吸引到二萬人，企滿半個海港，今年六四同七一，唔知會點？
講到保護維港，呢個政府，重有中方，又係值得譴責，喺一九九五年左右，本地親中報章率先發難，攻擊前殖民地彭定康政府，話「港英」臨走，靠害六百萬人，將個深水港逐啲填滿，破壞香港天然優勢！
當日左報對前殖民地政府說三道四嘅攻擊，白紙黑字，現時重存放圖書館，當日嘅親中勢力，話前殖民地撤出之前大搞陰謀，自己當日進駐香港，就係貪華南有一個唯一嘅深水港，𠵱家就快執包袱，就想將個維港填滿，搞到維港撞船風險大增，重唔係想破壞香港風水，兼搞到十三億人民冇運行？
點知言猶在耳，肥彭撤出，留番一個繁榮嘅大都會，特區成立七年來不但做正敗家仔，親中佬及中方當日大罵前殖民地政府填維港，今日嘅特首，自己重變本加厲，填海填得重更瘋狂！
有口話人，冇口話自己。就好似以前「搞革命」，識得破口大罵國民黨四大家族「貪污」，到自己奪權之後，貪污腐化重衰過國民黨百倍。「愛國」呢兩個字，係用嚟搵老襯嘅。
當日殖民地政府填海，都重話樓價土地值錢，成全包括中方資本在內全民狂炒嘅巨無霸貪慾。今日土地價賤，爛尾樓處處，神係佢，鬼又係佢，鬍鬚孫就藉口疏導中環交通，繼續完成英帝國主義未曾完成嘅破壞維港風水，阻住十三億人民發達搵水嘅大陰謀！施政報告又話要建立「環保港」，紅灣半島拆居屋，已經製造咗二十萬噸建築廢料，現時再上多棟，瘋狂填土殺港，簡直係戕殺香港人子孫萬代嘅生計！自私、短視、虛偽！
鄭大班為人聽講一向都好有俠義心腸，唔怪得佢又睇唔過眼，今次卒之都要拍咪而起，領導抗爭，加埋陸恭蕙、楊森等，揮動藍絲帶，組成護港泛藍軍！
加埋台灣嗰邊，選舉高潮迭起，好似浸緊冰火風呂，今年九月，香港人一定識得點樣投票。維港風水神聖不可侵犯，保護維港，就係最赤裸裸嘅「愛港行動」，維港風水不損，港人繼續搵錢，保護維港，亦係愛國，為親中左佬，重有乜聲出，中央人民政府，應該表態，全力支持特區護港泛藍大軍，繼續愛國愛維港！
傳真︰2623-9278
電郵︰