德國CeBIT直擊
作為科技指標的CeBIT，不但是手機的天下，娛樂影音亦都係重要課題之一，尤其近年MPEG4手提睇片熱潮方興未艾，世界各地廠商亦努力研發更強勁功能之手提睇片機種。會場上亦隱隱分為兩大路向，體積及容量！輕量派有東芝5mm厚手提機為代表，大食派則有三星之20GB睇片機，一於睇吓用家買大定買細！
記者、攝影：劉耀祥
手提睇片機自手提VCD機年代開始，隨着記憶卡及硬碟機愈做愈細，容量亦愈出愈大，最直接受惠的當然就係手提睇片機，會場上兩大陣營各派出頂級機種迎戰，比起台灣藍營綠營爭做總統更有娛樂性。
東芝在CeBIT展出了一部連喇叭底座嘅MPEG4手提播片機，記憶體使用了SD卡，雖然機身厚啲，不過外形一樣咁靚仔；再加埋可以外掛100萬像素鏡頭，兼拍MPEG4短片（每秒30格），比起好多數碼相機更勝一籌。播片效果亦靚得無話可說，320×240解像度完全冇格仔、狗牙之類的東西，睇完之後唯一想鬧嘅，就係點解重未有得賣！
韓國代表三星，今次亦有出招，不過重點並非放在鬥細，相反重「愈玩愈大」，不過講嘅並非體積，而係其容量。比起部普通CDWalkman更加細嘅YH-999，容量就已經有20GB，閒閒哋放幾套DVD入去都冇有怕。
而今年8月就會喺德國開賣，所以會場上一字排開任你睇任你玩，等大家一玩上癮。3.5吋顯示器睇片綽綽有餘，除可播放MPEG4短片，更兼容JPEG相片格式，甚至聽MP3都冇問題。YH-999開價$649歐羅，相等於港幣$6,500，有閒錢又有空閒周街睇戲嘅，的確諗得過！
東芝乃SD記憶卡的開山始祖，對於研發SD卡設備當然有一手。今次CeBIT會場上，東芝就展出超薄手提睇片機；唔係Concept唔係Dummy，絕對行得又走得，而且理所當然地以SD卡為儲存裝置，最大支援1GBSD卡，隨時成張DVD都食得落。
不過論驚嚇程度，其5mm厚度先係重點，完全可以收埋喺銀包度。薄得咁緊要，功臣乃3.45吋大OLED螢幕，320×240解像度，加上26萬色顯示，最緊要就係畫面質素及流暢度，令在場人士只可用驚歎嚟形容，與手機上仍採用幾色嘅OLED，直情係兩個世界。不過今次東芝純粹為ShowQuali，發售日期仍然未定，不如都係儲定錢先重實際啲！
通常於展覽會上，手機廠商會擺放概念機畀人睇，不過今次東芝就展出其概念PocketPC及配件。其概念食足手機大熱外形，大玩伸縮式，而且機身厚度相當薄，相信要變成真品都並非難事。
PDA喺今次展覽上較為失色，新機寥寥可數。Palm方面，老大哥PalmOne都只係全場擺滿Treo600，SONY就得部TH55撐足全場。好彩PocketPC方面就有華碩擔大旗，展出新作A730，帶來唔少驚喜唔單止因為有新機睇，而係A730外形夠索之外，功能更睇到人「索、索」聲，640×480解像度為東芝E800之後第二部高解像度PocketPC，兼且內置130萬像素鏡頭，暫時真係前無古人。再加埋內置藍芽及WiFi，機身體積都冇變大，期待度爆晒燈，預計今年8月登場！
