日本女星稻森泉，上年年尾演完處女舞台劇《法王廳的避孕法》之後，早排就獲雜誌《FRAU》邀請，到紐約拍特輯，佢話此行令佢提早獲得一個幸福嘅春天。
稻森泉話覺得紐約好似東京，兩個都係齊集最in物品嘅大都市，佢去到嗰邊，自然把握機會歎美食同shopping啦。
稻森泉先後去過紐約唔少好正嘅食肆，好似甜品好掂嘅Chikalicious、日本料理出色嘅Geisha同墨西哥餐廳LucyMexicanBarbeque。
稻森泉重去咗喺TimeWarnerCenter新開張嘅CoachCentralPark大掃春裝，重話自己帶住兩梳蕉入去，最後抽住兩大袋戰利品出嚟。
令稻森泉最滿足嘅，一定係為雜誌做埋Coach嘅模特兒，着起Coach新裝同襯埋新款手袋影靚相，搞到佢話喺紐約令佢提早獲得一個好幸福嘅春天。
曾經去過美國留學嘅稻森泉，去到紐約之後亦不忘為自己嘅英文補吓習。不過最搞笑係，佢一落機就去咗睇舞台劇《Aida》，但三個鐘都係同睡魔決鬥。