汽車專題：<br>老爺車Fans捧光岡手製車身好矜貴

汽車專題：
老爺車Fans捧光岡手製車身好矜貴

一提光岡Mitsuoka，車迷無不即時想起其一系列仿古車系，外殼古雅，設備先進，將新舊元素合二為一，這亦是其最大的賣點，所以推出至今不乏追捧者，老爺車狂熱分子丹哥就係其中一員。

記者：黃婉冰　攝影：林栢鈞



顯示屏睇晒車尾
丹哥屬愛車之人，特別是老爺車更是他的至愛，所以當他遇到這部一派老爺車味道的GalueII時，已被「她」那高貴懷舊外形深深吸引。
「佢個車款外形好典雅好靚，𠵱家全部新車車頭都無晒所有閃閃令嘅裝飾，惟獨係佢有晒所有Classical裝飾，雖然外表懷舊，但入面又好現代化，以前感覺老爺車機器方面唔夠安全，成日都唔敢載得太多人，但𠵱家感覺唔同晒。特別係個後波顯示屏，可以好清晰咁望埋個車尾，而且以前啲老爺車零件一舊就會霉，零件又難搵，但呢架就唔使擔心保養問題，而且售後服務好，再唔使花太多心機、金錢同時間。」

■車主丹哥最欣賞這架老爺車的典雅外表及高科技內櫳。

窄路轉彎易操控
不單止外形，對於車的性能，丹哥一樣給予高度評價。
「架車反應好凌厲，而且操控性好高，車身雖然大，但輪胎角度大，即使喺好窄嘅地方轉彎都好易操控，揸起嚟好有Power，我好鍾意呢種動感，3000cc、二百幾匹馬力行車好暢順好足夠，我覺得外國跑車都畀唔到我呢種動感。」

老人家都話舒服
丹哥最喜歡與家人假日驅車周圍去，所以車廂的舒服性亦是他最考究的地方。
「車廂好寬敞舒適，就算老人家坐都覺得好舒服，設備齊全、實用，設計好照顧周到，好多基本設備都係同級車畀唔到，我同屋企人都好鍾意，無一款日本車可以畀到我呢種感覺！」

車廂High-tech裝備

1.倒車顯示

■車尾設有鏡頭，車尾四周情形就會清楚顯現在螢幕上。

■中控台上的小螢幕可以用作鏡倒車時之用，攝錄角度幾廣闊，泊車方便安全。

2.播VCD都得！
■螢幕除可作倒後泊車之用外，同時可提供不同的汽車資訊如耗油量、維修資料，亦可用來播放VCD。

3.中文按鈕
■按鈕全寫上中文，但顯示則用上日文，丹哥表示惟獨是這點美中不足。



其他貴氣設備

4.隱蔽插頭
■前排手枕位下方特別設有三個電源插頭，後座乘客就可以用來插手提電腦，有蓋遮蔽，唔怕入塵。

5.軚控音響
■四幅式真皮軚環上有音響操控按鈕，便於一邊駕駛一邊調校。

6.預設開關
■車廂燈及車頭燈可透過電腦來設定開關時間，非常方便。

電動座椅
■前排座椅的電動調校掣設在椅側，更為就手。

■就連車尾的金屬製泵把亦是由人手製成。



保護性設計

■座椅用上真皮裝嵌而成，加上特大的手枕及寬敞空間，坐得舒服。

■桃木襯白色真皮，令波箱盡顯貴氣。

特高車門
■車門設計特別高，而且內設防撞桿，可增強保護性，但車窗就相對地變得較細。

軟膠扶手
■前座椅背的軟膠扶手，可減輕碰撞時的撞擊力。

光岡GalueIIDeluxe3.0
引擎：2987V6DOHC
馬力：240ps/6400rpm
扭力：31.5kgm/3600rpm
傳動：4前速自動波
懸掛：（前）柱式獨立（後）多連桿
制動：（前）透氣碟（後）透氣碟(ABS)
輪胎：205/60R16
尺碼：5140×1770×1450mm
軸距：2800mm
車重：1620kg
新車售價：$638,000
查詢：恒昌汽車（24782877）