在美國大學修讀平面設計的Stephen，回港後並沒學以致用，九五年時寧願在電影《女人四十》和《霹靂火》中做臨時演員，等待一個晉身星路的機會。最終皇天不負有心人，Stephen之後與雷頌德組成Dry，星途嶄露曙光。九六年還開始擔正演出電影《三個受傷的少年》和《美少年之戀》。
然而外形俊朗兼有學識的Stephen，在幕前發展相比起合作過《特警新人類》系列的陳冠希和謝霆鋒，成績顯然較遜，但他說：「各有前因莫羨人，王晶曾經同我講過一個賽跑理論，佢話有啲人可能好快會彈出，但如果個跑手有耐力，最終亦有機會跑出。好似周星馳咁，佢同梁朝偉同期出道，但偉仔好快彈出，而佢喺後邊發力，最終佢嘅喜劇天份咪一樣得到觀眾認同！我諗我屬於慢熱嘅類型啦。而且我敢講，自己係同輩藝人之中比較勤力嘅一個，但我背後做嘅嘢，未必俾人見到，就好似我做導演，由籌備到拍完足足搞咗半年，到最近幫部戲做後期，我都係親力親為。」
在未來日子裏，Stephen希望能主力在導演和演員方面繼續發圍。至於唱歌，他自言興趣不大，故暫時沒打算再踏足歌壇，他說：「我其實唔係咁鍾意唱歌，我以前都有彈吓結他，寫吓歌，但唔識好似機器咁生產。其實導演費好少，花嘅時間又好長，但呢個係我嘅理想，而開拍《大佬愛美麗》呢類商業味咁重嘅戲，並唔係因為向現實低頭，而係我覺得電影係應該雅俗共賞。」
出道九年的Stephen在演藝圈中曾遇過一件事，至今仍令他耿耿於懷。話說當年Stephen和雷頌德合組組合Dry時，兩人可算是沙煲兄弟。及後雷頌德跟張燊悅的戀情曝光，當時張燊悅暗罵有人為了討好傳媒，竟將他倆的戀情告知記者，矛頭直指馮德倫。自此，馮德倫和雷頌德漸漸疏遠起來。
提起這件陳年舊事，Stephen心中還是滿肚鬱結，他說：「我係好憎俾人屈，我從來唔會做二五仔，更加唔會將朋友嘅秘密當做人情，因為朋友對我講嘅嘢係好緊要。如果我係咁嘅人，今日我喺呢個圈唔會重有咁多好朋友。我相信時間可以證明一切，如果有朋友因呢啲誤會搞到冇朋友做，我亦唔覺得有乜可惜。不過件事都過咗咁耐，我都唔講太多，但當時我真係好激氣，因為出賣朋友呢個罪名太大，係關乎我嘅聲譽。」
