馮德倫執導的首部電影《大佬愛美麗》邀來緋聞女友莫文蔚擔任女主角，對方還只收了一半片酬以示支持。當談到莫文蔚，馮德倫表示非常欣賞其爽朗性格，並常常向她傾訴衷腸。
三十歲不足的馮德倫（Stephen）去年底獲英皇電影支持，投資千多萬給他做導演，拍攝《大佬愛美麗》，《大》片圍繞一個同性戀的江湖大佬。拍攝前，Stephen向不少同性戀朋友搜集資料，更曾有同性戀朋友希望Stephen成為同性戀者。
Stephen笑說：「我嘅同性戀朋友曾經游說過我，佢話：『Stephen，你又未試過同性戀，你又點知同性戀嘅樂趣，點解唔試吓？』不過我好清楚自己嘅性取向，所以我同佢講，你未試過有女朋友，又點知異性戀嘅樂趣有幾好呢？朋友性取向係點，我會尊重，不過我好肯定自己唔會由直變攣。」
其實Stephen人緣不錯，他首次執導影片，圈中好友如吳彥祖、陳奕迅、謝霆鋒和緋聞女友莫文蔚均拔刀相助，特別是莫文蔚。Stephen說：「部戲搵咗Eason（陳奕迅）同Daniel（吳彥祖）做男主角之後，好老實講已經冇乜成本可以再請有份量嘅女主角，但個角色就真係好啱Karen（莫文蔚）做，所以諗嚟諗去，我都係硬住頭皮向佢開口，結果佢好幫手，只係收半價拍我呢部戲。」
雖然Stephen和莫文蔚這對戀人從不公開承認戀情，但莫文蔚破例以一半片酬演出〈大》片，足證兩人關係非淺。Stephen口中雖沒證實女友是莫文蔚，但每次提起對方總不期然流露笑意，他說：「我同佢都知道一齊合作拍戲，一定又俾人話緋聞男女合作，但我哋覺得大家都係做嘢啫，所以冇理咁多。」
Stephen續說：「我覺得感情屬私人事，冇必要同公眾去交代，所以你哋點問我，我都唔想講咁多，因為我驚會影響到對方，總之我𠵱家同女友感情好穩定同開心，但暫時就未諗過結婚呢個問題，畢竟今年我都只不過二十九歲，事業重未有成。不過我對呢個女朋友係好欣賞，雖然間中會有小爭執，但無礙雙方嘅感情，因為我同佢都係理智型嘅人。」
Stephen對莫文蔚的評價亦相當高，他說：「我好喜歡聰明嘅女仔，Karen好聰明，性格好爽朗，同佢一齊你好容易感受到呢份喜悅，所以我一唔開心就好鍾意搵佢傾偈，反而好少會同屋企人講。」
撰文：陳月媚
攝影：仇志德
場地提供：SohoSpice
