上星期個市又再令唔少投資者失望，原本被市場一致睇好嘅中芯（981）就喺啲咁差嘅氣氛下掛牌，一開市連底價都不保，最多重跌超過1成。
睇番中芯今次招股，都算幾多波折，首先未截止認購，主要股東北大青鳥（8095）沽成兩億幾貨出街，再加埋中芯管理層做路演時講錯嘢，搞到要撤回部份內容，結果當然惹來唔少大戶對佢哋嘅不滿。聽啲大行朋友講，有唔少原本係國際配售嘅大客，喺最後一刻改變初衷撤回落咗嘅飛。喺貨源充足下，隻股反彈到去邊個價都有沽壓。
有朋友估計，話雖然好多人出嚟炒即日鮮，但如果每升兩三個價就有人出嚟沽一批貨嘅話，市場上起碼要消化個零兩個月，隻股先有機會升番上水面，各位抽中嘅朋友，如果要唔使輸走貨，可能要等多一陣。
上個禮拜最大單嘅批股刁，就係荷蘭殼牌沽清手上中石化（386）嘅股份，佢哋之所以沽貨，有場內人士八到話同殼牌今年嘅業績唔靚有關，話佢哋希望借沽中石化股份套現資金外，亦可以將每股個幾嘅盈利入帳落袋，保住今年個業績。雖然殼牌唔係睇淡中石化嘅前景而沽貨離場，但始終會令到市場擔心其他策略投資者趁熱鬧沽貨，令中石化同中石油（857）兩隻股份都軟晒手腳。
不過有芬佬朋友話，佢哋仍然係睇好今年石油同石化股嘅走勢，但為咗唔好冒市場再批股嘅風險，佢哋會順住個大市去沽隻中石化同中石油，但會掉轉頭去買隻啱啱拆細咗中海油（2998），話風險應