三位老護法來港登壇施法，希望來一招獅子吼，嚇走啲「賣國小人」，點知香港人反應不佳。護法之後變成和顏悅色，陰聲細氣，變成溫柔敦厚嘅老祖父，大家都開胃啲。
唔使俾人擺上枱做騷，三老護法極有人情味，搵隨行打點嘅幫手召集一班老記｜｜老鬼記者也｜｜去灣仔萬麗海景酒店聚一聚。想當年基本法草委在京開會期間，好多香港記者蜂擁上京採訪，同三位護法混得好熟。呢班老記之中，有兩位已經飛黃騰達，十九年前初出道嘅信報靚仔記者盧永雄已貴為星島日報CEO，位高權重，有資格保護護法；文匯報陳建平已成為特首辦紅人，掌握機要。其他人冇咁好運嘅，都成為採主級或者副總編輯，其中一位，個個星期在維多利亞公園主持城市論壇，就係港台謝志峯，記得六四當晚，佢匿埋廁所報道新聞，險過剃頭，好彩有貴人相救，有驚無險。
大記者話許崇德大罵人哋將佢嘅畫像打交叉之後，第朝早就睇《蘋果日報》如何報道，佢對啲老鬼記者講：「《蘋果》報道都幾公正，引起一陣哄動，以此觀之，老護法們點都能夠主持公道，不過有時人在江湖，點話點好啦。
老人家經歷文革時期，見過戴上牛鬼蛇神帽子，俾紅衞兵押住遊街示眾嘅情景，想起就驚。其實香港還有法治，冇人可以做紅衞兵，長毛雄在畫像上打交叉，大可一笑置之。文革時代，無法無天，今日香港，有節有理，老護法幫吓手，唔好俾一啲盲毛愛國派搞彎香港，就天下太平。