李連杰最近由美國返咗香港拍廣告，前晚趁唔使開工，就約老友向華強老婆陳嵐去上環睇佛珠，之後向太就帶杰仔去中環一間馳名牛腩麵檔九記醫肚。
呢間食店有唔少名人幫襯過，好似周潤發、梁朝偉同劉鑾雄都鍾意喺度醫肚，不過杰仔就係第一次嚟九記，雖然佢戴住帽，刻意低調，但始終俾食客認出。
杰仔就叫咗碗清湯牛腩麵，而向太噚日就同馮仁昭講：「同杰仔睇完佛珠，我就帶佢去九記食牛腩，佢第一次嚟食，重話幾好食。以前杰仔唔食牛嘅，係近年先食番，諗唔到喺嗰度食嘢都會俾人發現。」
康華、朱咪咪同梅小惠等一班無綫藝員前晚喺電視城拍攝新節目《男才女藝大熱鬥》，佢哋以後逢星期五都會演出一個現場環節《周五綜藝館》。而前晚重請嚟陳小春、羅冠蘭同許愿做評判，康華同黃金己瑩着住條芭蕾舞裙跳舞，康華重酥胸半露，搶晒風頭，直頭令唔少男士流晒鼻血！
陳松伶噚日去南華會出席保良局慈善保齡球賽，佢一到場就好緊張，重好認真咁密密喺度練習。
比賽時，松松雖然唔可以第一次就全中，但佢嘅球技都唔差，姿勢亦有板有眼，可惜最後佢哋嗰隊都不敵由譚詠麟為首嘅明星足球隊。
趙雅芝同柳影紅月尾會喺文化中心舉行一個慈善音樂會。佢噚日喺銅鑼灣練歌時話一直都有keep住唱歌，到時會獨唱《漫步人生路》以及同另一個拍檔合唱《上海灘》。其實趙雅芝好耐冇喺台上表演，加上佢首次喺香港公開獻唱，唔怪得柳影紅話啲飛賣得好好。
劉浩龍噚日好嬲咁同記者講，話佢個手機號碼早排俾人張貼咗上網，個網友重要話個號碼係屬於陳奕迅嘅，搞到佢三日之內收到二百幾個電話，最後就嬲到報警。劉浩龍話最慘嘅係迫住轉電話號碼，因為佢忍受唔到凌晨三、四點都收到啲唔出聲嘅電話。我馮仁昭聽到都覺得佢慘！
許冠傑（Sam）首新歌《04祝福你》MV，本來一早傾咗畀無綫首播，但唔知點解無綫嗰邊一拖再拖，所以唱片公司決定自己搞啟播活動。佢哋會租晒全港好似時代廣場同海港城嘅大型電視幕牆，然後全香港同步播放，當係阿Sam送畀全港市民嘅禮物，馮仁昭覺得呢個做法幾有意義！
